Amăng mông bưp, mơnuih ƀôn sang să Tà Năng hơmâo lu tơlơi pơgôp hiăp, tơlơi rơkâo bơdjơ̆ nao tơlơi hơdip mơda, bơwih ƀong huă, djru mơnuih mơnam hăng bruă mă mơng gong gai ƀon lan. Đĭ pơhiăp amăng mông bưp, Ơi Phan Đình Trạc tŭ yap hơdôm tơlơi pơgôp lăp djơ̆ mơng mơnuih ƀôn sang, pơsit tong Khul Khua pơ ala mơnuih ƀôn sang tơring čar amra pơƀut glăi, mơ-it nao hơdôm anom bruă bơdjơ̆ nao sem lăng, pơsir hĭ amăng hrơi blan tañ hloh.

Laih dong rơkâo tơring čar Lâm Đồng đing nao, pơsir hĭ klă hloh bruă ngă brơi hră yua lŏn mơnai, ngă tui djơ̆ tơlơi pơkă amăng tơlơi phiăn, pơhlôm tơlơi dưi sit nik mơng mơnuih ƀôn sang; laih dong jao anom bruă kông ang pel ĕp, ngă rơđah yua hơget rơngiă hră lŏn sang kiăng pơsir hĭ tơlơi glăm ba tui tơlơi pơkă.