Tal rai čuă jơmư anai yom biă mă, sa bruă mă pơblih nao rai khua mua pơprong amăng kơnuk kơna blung a yap mơ̆ng hrơi akŏ pơjing bruă pơtom hiăp sui hăng anai krep 45 thun pơ hlâo adih (1980-2025). Tlam lơ 12/11, tơdơi kơ ngă yang čơkă jum sit nik, Khua mir sir ơi Lương Cường hơmâo bơkơtuai hăng ơi pơtao dêh čar Jordan. Amăng mông bơ ră ruai mơak, rơhmač, tơpă ară, đăo kơnang nao rai laih anun thâo hluh tơdruă, dua čô khua tŭ ư hrŏm, kiăng ba tơlơi ngă giăng mah dua bơnah yak nao amăng sa yak phrâo.

Dua bơnah kiăng ngă kơjăp tui bruă kơđi čar, pran jua đăo kơnang tơdruă, pơblih brơi khul khua mua čuă jơmư trư găn, boh nik ñu khua mua pơprong gưl kơnuk kơna. Laih dơ̆ng pơtrut ngă hrŏm amăng lu bruă mă pơkŏn, amăng anun hơmâo bruă pơgang dêh čar, rơnuk rơnua, hơđong, kah pơpha nao rai tơlơi pơhing, ƀing mơnuih rơgơi kơhnâo gưl dêh čar…Amăng tơlơi bơwih ƀong huă, dua čô khua tŭ ư hrŏm ngă gêh găl hloh kơ bruă pok anih anom sĭ mơdrô hơdôm mơta gơnam gêh găl tơdruă hơmâo, laih dơ̆ng pơtrut pơsur sang bruă mơdrô dua bơnah kơsem min bruă či ngă hrŏm, tuh pơ alin, biă mă ñu amăng bruă pơđĭ kyar čuk pơkra jơlan glông, bơwih ƀong huă mơtah mơda, bơwih ƀong huă mrô, bruă dăng kông, pơkra ming gơnam sĭ mơdrô, boh čroh đang hmua…..ơi pơtao dêh čar Jordan rơkâo dua boh dêh čar kơsem min pok jơlan rơdêh por dưi por nao rai truh pơ dua bơnah dêh čar mơtam. Dua bơnah ăt hơmâo pơčrong sai lu hơdră kiăng pơtrut ngă hrŏm gah ia jrao, anŏ gêh găl mơ̆ng dêh čar Jordan, biă mă ñu amăng bruă pơkă lăng hăng pơjrao duăm ruă mơ̆ng ataih, ba yua boh thâo ia rơgơi phrâo pơjrao duăm ruă.