Jơnum anai lăi pơthâo anăn 85 čô khua pơ ala mơnuih ƀôn sang tơring čar hơmâo ruah đĭ, laih dong pơphun ruah ƀing khua prong. Tui anun, ơi Rah Lan Chung, Kơ-iăng khua Ping gah tơring čar Gia Lai, hơmâo ruah glăi ngă Khua jơnum min pơ ala mơnuih ƀôn sang tơring čar; ơi Trương Văn Đạt hăng yă Huỳnh Thúy Vân hơmâo ruah ngă Kơ-iăng khua jơnum min pơ ala mơnuih ƀôn sang tơring čar.

Pơhiăp ƀơi mông jơnum, Khua Ping gah tơring čar Gia Lai ơi Thái Đại Ngọc lăi dlăm, rơwang bruă 2025-2030, Gia Lai kiăng hơmâo rơnoh GRDP mơ̆ng 10% truh kơ 10,5%, jing anih pơtruh yom biă plah wah Dap Kơdư Dơnung Tong Krah hăng hơdôm kual bơwih ƀong. Kiăng dưi ngă tơlơi anai, khua mua pơ ala mơnuih ƀôn sang tơring čar Gia Lai kiăng pơplih phrâo, jơnum klă tui; pơƀut pơčrông tơlơi phiăn, hơdră djru lăp djơ̆ kiăng pơhưč tuh pơ alin, pơkra anih anom, jơlan nao rai, boh thâo mrô hăng boh thâo ia rơgơi phrâo.