Hlâo anun ăt hrơi anai mơn, Khul pơphun bruă gơnong glông lăi pơthâo tơlơi pơtrun mơng Khul git gai Ping gah ruah ơi Trần Phong, kơ-iăng Khua git gai Ping gah, Khua Jơnum min mơnuih ƀôn sang tơring čar Quảng Trị, ngă Kơ-iăng Khua git gai Ping gah tơring čar Khánh Hòa rơwang thun 2025-2030. Đĭ pơhiăp amăng mông jao bruă, ơi Trần Phong pơ-ư ang lơm hơmâo Ding jum kơđi čar hăng Khul git gai Ping gah đăo gơnang jao bruă, laih dong ƀuăn amra gơgrong, abih pran jua kiăng ngă pơđĭ kyar amăng tơring čar hăng tơlơi hơdip mơnuih ƀôn sang.

Ñu pơsit tong amra hrŏm hăng khua mua tơring čar pok pơhai tŭ yua tơlơi pơtrun mơng Jơnum Ping gah tơring čar, hơdôm tơlơi črâo trun, hơdră bruă mơng gơnong glông brơi kơ Khánh Hòa; tŏ tui pơjing Ping gah ngă bruă tơpă sit, hơđong kjăp, pơplih phrâo amăng bruă git gai, hrưn đĭ klă amăng git gai wai lăng; pơtrut thâo pơmĭn khin ngă kiăng ngă tui hơnong pơkă ba Khánh Hòa jing ƀôn prong gah gơnong glông amăng thun 2030.