Khua git gai pơ ala mơnuih ƀôn sang dêh čar ta hok mơak ƀuh boh tơhnal ngă hrŏm jai hrơi kơjăp, tong ten hăng tŭ yua plah wah khua pơ ala mơnuih ƀôn sang dêh čar, biă mă ñu amăng bruă pok pơhai tơlơi pôr hrŏm Việt Nam-Lao, tơlơi pơkôl mơ̆ng dua bơnah Ding jum kơđi čar, Hră pơkôl ngă hrŏm dua bơnah Kơnuk kơna hăng hơdră mă bruă mơ̆ng dua bơnah sang bruă khua pơ ala mơnuih ƀôn sang, kiăng djru hrŏm pơđĭ tui tơlơi rô nao rai plah wah Việt Nam hăng Lao jai hrơi kơjăp tong ten hơđong.

Ƀơi mông bưp, dua bơnah tŭ ư ăt pơtrut tui djop bruă mă yom amăng thun 2025; hur har hloh prăp lui bruă rai čuă Việt Nam mơ̆ng Khua git gai ping gah, khua mir sir dêh čar Lao ƀrô hơdor glăi 80 thun Hrơi hơkrŭ blan čơpăn hăng Hrơi akŏ pơdong kơnuk kơna lŏn ia lơ 2/9; pơtrut kơtang bruă ngă hrŏm sang bruă khua pơ ala dua bơnah hăng lu bơnah.