Kiăng hơdor bơni kơ pran jua prong prin tuh rơyuh kơ bruă čar mơ̆ng khua mua hơđăp nao hlâo, amăng tal nao čuă hăng mă bruă ƀơi tơring čar Vĩnh Long, mơguah lơ 4/9, Khua git gai pơ ala mơnuih ƀôn sang dêh čar ơi Trần Thanh Mẫn nao dưm guang bơnga, čuh ñang h’ŭ ƀơi sang hơdor pioh Khua Jơnum min Khul ding jum dêh čar ơi Phạm Hùng ră anai lĕ khua dêh čar hăng anih hơdor pioh kơ Khua dêh čar hơđăp ơi Võ Văn Kiệt. čih pioh amăng hơdrôm hră djă pioh ƀơi anai, Khua git gai pơ ala mơnuih ƀôn sang dêh čar ơi Trần Thanh Mẫn pơdah rai pran jua ol kơdol hning tơngôt glăi laih anun čuh ñang ƀơi anăp rup pơpŭ kơ bơngăt jua rơgom ơi Phạm Hùng sa čô khua prong hơmâo kơnuih hiam hing ang kơ ping gah, Kơnuk kơna ta, sa čô ană bă rơgơi mơbruă mơ̆ng plơi pla tơring čar Vĩnh Long khin hơtai.

Čuh ñang, dưm guang bơnga ƀơi anih hơdor pioh kơ khua hơđăp dêh čar rơgom ơi Võ Văn Kiệt, ƀơi tơring glông Vũng Liêm, Khua git gai pơ ala mơnuih ƀôn sang dêh čar ta ơi Trần Thanh Mẫn hrŏm hăng grup nao hrŏm pơdah rai pran jua pơpŭ pơyôm biă mă kơ rơgom ơi Võ Văn Kiệt Khua dêh čar, mơnuih pioh lui tơl abih tơlơi hơdip pô ñu kơ bruă mă hơkrŭ, tong ten hăng lŏn ia, hur har mă bruă yua kơ ană plơi, hơdip rơ-un hơdjŏm, jĕ giăm, rơnang pran biă mă, dưm anŏ tŭ yua kơ ping gah, kơ lŏn ia, kơ mơnuih ƀôn sang yơh yôm hloh; sa gru pơhmu yôm nao hlâo, tơpă hiam kơ pran jua rơgoh ngă hơkrŭ; sa čô mơnuih ping gah cộng sản tơpă hăng pran jua thâo khăp pap, luă gŭ dŏ hiam na nao amăng pran jua mơnuih ƀôn sang hăng gơyut gơyâo jar kmar.