Mă bruă hăng Jơnum min Gru grua hăng Mơnuih mơnam mơ̆ng Sang  bruă pơ ala mơnuih ƀôn sang dêh čar, ơi Trần Thanh Mẫn lăng yom amăng bruă kơsem min čih pơkra tơlơi phiăn, abih amăng sa guang bruă, Jơnum min anai hơmâo git gai brơi sem glăi pơtong rơđah 20 mơta hră tơlơi phiăn čih phrâo, 6 pok hră pơtrun mơ̆ng khua pơ ala mơnuih ƀôn sang dêh čar, 1 kơčăo bruă hlăk čih phrâo Hră pơtrun ngă hăng 6 pok hră pơtrun mơ̆ng Jơnum min apăn bruă phun pơ ala mơnuih ƀôn sang dêh čar.

Lăi nao, hrŏm hăng rơnoh pơđĭ kyar bơwih ƀong huă, khom đing nao hơdôm tơlơi hơmâo amăng mơnuih mơnam dêh čar laih anun gru grua, tui hăng khua git gai pơ ala mơnuih ƀôn sang dêh čar lăi lĕ, anai lĕ  bruă mă pơdjơ̆ nao amăng tơlơi hơdip mơda, bơngăt jua tơlơi mơak mơ̆ng mơnuih ƀôn sang. Gru grua ƀudah juăt lăi gru grua hiam jing anŏ pioh kơ rim čô mơnuih ƀôn sang kiăng hơmâo tơlơi hơdip hiam drơi jăn pran jua, hơ̆k mơak laih anun hyuk hyak hloh. Tui hăng khua git gai pơ ala mơnuih ƀôn sang dêh čar lĕ, gah bruă gru grua hiam, mơnuih mơnam ră anai ƀơi lŏn ia ta hơmâo lu tơlơi ƀuh hiam klă, samơ̆ ăt dŏ hơmâo mơ̆n bơnah aka ƀu djơ̆ găl kiăng hơmâo lu hơdră sa hnơ̆ng pơsir hĭ. Yua kơ anun, Jơnum min anai kiăng krăp lăng tong ten, kơsem min hăng prăp lui hlâo tơlơi či rơkâo đĭ, lăi pơthâo tañ hăng ping gah, kơnuk kơna ta.