Pơhiăp git gai jơnum mă bruă, Khua git gai pơ ala mơnuih ƀôn sang dêh čar rơkâo brơi ngă pơrơđah hloh hơdôm tơlơi kah hăng: hơdră pơblih mơ̆ng bruă “pơtong glăi bruă amăng hră pơar”, nao kơ bruă “pơtong glăi hră pơar jơlan hơdră”, prăp lui ngă hrŏm tañ amăng čăl pơtrun ngă tui amăng jơlan hơdră.

Khua git gai pơ ala mơnuih ƀôn sang dêh čar lăi pơtong, ƀing pơ ala mơnuih ƀôn sang dêh čar tŭ ư hrŏm hăng kơnuk kơna čih pơkra hră pơar tơlơi phiăn khom hơmâo tom hră pơtrun, hră pơtô brơi ngă tui tŭ yua. Kơ bruă krăp lăng pơphun ngă tui tơlơi phiăn, tui hăng khua git gai pơ ala mơnuih ƀôn sang dêh čar lĕ, kiăng lăi pơthâo rơđah tơlơi rơkâo phun krăp lăng amăng rơwang bruă tal anai, amăng bruă mă gah sang bruă prăk, chứng khoán, pơhlom nua, tuh pơ alin kơ bruă čar, kông ngăn, ngăn drăp kơnuk kơna, hơdôm kơčăo bruă phun hăng tơlơi bơwih ƀong huă sang bruă mơdrô yua mơnuih ƀôn sang ngă pô. Tơhnal pơkă pơđĭ kyar lu hăng hơbô̆ bruă pơtrut rơnoh pơđĭ kyar phrâo, Jơnum min Bơwih ƀong hăng Prăk kăk kiăng lăi pơthâo hăng khua pơ ala mơnuih ƀôn sang dêh čar amăng bruă sem lăng tơlơi hơđong, bruă mă tơpă hnơ̆ng yua prăk kăk-ngăn drap kơnuk kơna, pơhlom hơđong hnưh  dong yua prăk kơ bruă čar, laih dơ̆ng khom pơkă lăng hơmâo rơnoh pơkă amăng jơlan hơdră brơi rơnoh pơđĭ kyar, pơblih pơčeh phrâo hăng pơđĭ kyar mrô mơnuih mă bruă phrâo.