Ƀơi rơnưh Nà Nưa, ơi Trần Thanh Mẫn hăng grup hyu mă bruă pioh sa mơnit h’ŭ glăi kơ Khua mir sir Hồ Chí Minh; pơdah pran jua thâo hơdor tơngia prong prong kơ pran jua Wa ngă bruă hơkrŭ, sa čô khua kơhnâo rơgơi, pơyơr abih tơlơi hơdip pô kơ bruă hơkrŭ kiăng pơklaih rơngai djuai ania, pơlir lŏn ia jing sa, brơi tơlơi rơngai mơai pô, tơlơi hyuk hyak mơak klă kơ ană plơi pla.

Tŏ tui dơ̆ng, Khua git gai pơ ala mơnuih ƀôn sang dêh čar ơi Trần Thanh Mẫn nao čuh ñang h’u laih anun pla phun kyâo hơdor pioh ƀơi pra yang Tân Trào, anih pơphun jơnum khua mua pơ ala mơnuih ƀôn sang amăng dêh čar hlăk anun lơ 16 hăng lơ 17/8/1945, pơsit hĭ pơtrun ƀơi mông jơnum, kiăng tơgŭ blah sua glăi gong gai kơnuk kơna ƀơi dêh čar. Ơi Trần Thanh Mẫn, pơdah pran jua čang rơmang hrŏm hăng abih bang amăng ping gah, ling tơhan hăng mơnuih ƀôn sang dêh čar ta gir run pok pơhai ngă tui tŭ yua djop jơlan hơdră, anăp ngă bruă, hơdră prong pơsir mơ̆ng Gơnong dlông ping gah, khua mua pơ ala mơnuih ƀôn sang dêh čar, kơnuk kơna dêh čar ngă, kiăng ba lŏn ia yak nao amăng rơnuk hrưn đĭ phrâo, pơđĭ kyar pơdrong sah, hing ang hloh kơ djuai ania.