VOV4.Jarai-Mơguah lơ 30/9, Ping gah tơring čar Gia Lai hơmâo pơphun jơnum lăi pơthâo hră pơtrun ruah ơi Trương Hải Long Kơ-iăng Khua git gai ping gah, Khua Jơnum min mơnuih ƀôn sang tơring čar ngă Khua git gai ping gah amăng sang bruă Jơnum min mơnuih ƀôn sang tơring čar Gia Lai.

Ơi Hồ Văn Niên-Khua git gai ping gah tơring čar Gia Lai jao hră pơsit hăng brơi

guang bơnga kơ ơi Trương Hải Long

Ƀơi mông jơnum, Ping gah tơring čar Gia Lai pôr pơthâo hră pơtrun mơ̆ng khua mua git gai ping gah tơring čar kơ bruă ruah pô ngă khua sang bruă jơnum min mơnuih ƀôn sang tơring čar Gia Lai rơwang bruă thun 2021-2026 hăng ơi Trương Hải Long. Pơhiăp lơ̆m tŭ mă bruă jao, ơi Trương Hải Long brơi thâo, drơi jăn ñu pô ăt khom gir run hloh, abih pran jua, mă bruă hur har tong ten; ngă tui djơ̆ tơlơi phiăn djop pô ngă khua pô amăng ping gah, djơ̆ tơlơi phiăn, tơlơi pơtrun mă bruă  hrom abih bang khua mua apăn bruă ping gah amăng Jơnum min mơnuih ƀôn sang tơring čar, gum pơgôp, găn rơgao tơlơi tơnap tap, lông lăng hăng khom gơgrong ba bruă mă yua kơ tơlơi pơđĭ kyar hrom amăng tơring čar.

Nay Jek: Pơblang