Tlam tom brơi, lơ 25/9, tui mông Việt Nam amăng tal nao čuă jơmư sit nik dêh čar Bulgaria, lơphet čơkă ơi Vương Đình Huệ, Khua git gai pơ ala mơnuih ƀôn sang dêh čar ta pơphun prong biă mă ƀơi plơi prong jưh jom Sofia, yua kơ Khua git gai pơ ala mơnuih ƀôn sang dêh čar Bulgaria, ơi Rosen Zhelyazkov git gai. Tơdơi kơ ngă lơphet čơkă jum, Khua git gai pơ ala mơnuih ƀôn sang dêh čar Bulgaria hlong bơkơtuai hăng khua git gai pơ ala mơnuih ƀôn sang dêh čar ta ơi Vương Đình Huệ.

Ƀơi mông bơkơtuai nao rai, ơi Vương Đình Huệ lăi pơtong, Việt Nam lăng yom biă mă hăng čang rơmang kơtưn tơlơi ngă giăng mah hiam mơak, ngă hrŏm lu mơta hăng dêh čar Bulgaria: đăo kơnang tal nao čuă jơmư anai djru pơtrut hrŏm dua bơnah mă bruă tŭ yua hloh, kjăp kơtang amăng lu bruă mă. Tui hăng tơlơi ngă giăng mah tong ten, tơpă, djơ̆ hnong gru grua mơ̆ng hlâo, dua bơnah ăt bơlăi nao rai puăi tlao mơak rơhmač, kiăng pơčrong sai lu bruă mă dua bơnah đing nao hăng bruă hơmâo ƀơi jar kmar ngă hrŏm dua bơnah laih anun lu bơnah. Hăng tơlơi čang rơmang khut khăt, ba tơlơi ngă giăng mah jai hrơi kjăp, tŭ yua, dơlăm hloh laih anun tŭ ư bruă ngă hrŏm pơ anăp anai prong tui.