VOV4.Jarai - Anăp nao Hrơi Jar kơmar ngă plai ƀiă ƀu tơphă yua kơ ayuh hyiăng ƀu klă hăng Hrơi ASEAN wai lăng tơlơi ayuh hyiăng, mơng lơ 13 truh lơ 19/10/2022, PC Daklak hmâo pơphun laih lu bruă lăi pơhing, djru pơđĭ tui tơlơi pơmin, bruă gơgrong mơng hơdôm grŭp hăng mơnuih amăng bruă pơgang, pơgăn ayuh hyiăng.

Hăng anăn ñu “lăi pơtă tañ hăng hmâo bruă mă tañ”, hơdôm bôh anom apui lơtrik Daklak lăi pơhing na nao tơlơi pơhing, gru rŭp bruă pơgang pơgăn ayuh hyiăng ƀu klă amăng hơdôm glông pôr pơhing, jơlan hơdră pơhlôm mơnuih mă bruă mơng anom, amăng plăng web; yôl ƀăng rôn ƀơi anih mă bruă hăng hơdôm kual hmâo lu mơnuih ƀôn sang dô̆...

Sang bruă ăt gơgrong hlâo mơn khul mơnuih, rơdêh, măi mok, amra pok pơhai mơtăm hơdôm jơlan gah bŏng glăi lom hmâo ayuh hyiăng ƀu klă, tơlơi truh. Hrơi jar kơmar ngă plai ƀiă tơlơi ƀu tơphă yua kơ ayuh hyiăng ƀu klă lơ 13/10 dưi pơphun amăng thun 1989, yua kơ Sang gum hơbit djop dêh čar pơphun kiăng pơtrut bôh thâo đơ đam rŏng lŏn tơnah thâo kơ plai răm rai yua kơ ayuh hyiăng ƀu klă ngă. Khul gum hrom hơdôm bôh dêh čar kual ASEAN ăt mă hrơi anai mơn pioh ngă hrơi ASEAN wai lăng ayuh hyiăng ƀu klă ngă rim thun./.

VOV.TN/Siu H’ Prăk pơblang