Plơi Trăng Nó Kon Blo, să Đăk Kôi, tơring glông Kon Braih, tơring čar Kon Tum hmâo 120 bôh sang anô̆ abih bang mơnuih ƀôn sang leng kơ djuai ania Hơdang. Kiăng djru mơnuih ƀôn sang amăng plơi pơplih tơlơi pơmin, pơplih hơdră ngă hrưn đĭ amăng bơwih ƀong huă ngă đang hmua, đĭ tui prăk pơhrui glăi pơplih tơlơi hơdip mơda, Grŭp ping gah plơi Trăng Nó Kon Blo pơsit 21 čô mơnuih ping gah khom ba jơlan hlâo ngă gru hlâo. Mơ̆ng hơdôm hơdră pơđĭ kyar bơwih ƀong sang anô̆ ba glăi bôh tơhnal klă mơ̆ng mơnuih ping gah, kah hăng: mă yua pơjeh pơdai phrâo, bơwih brơi djơ̆ hơdră ba glăi bôh yua prong; pơ ala phun hơbơi plum hăng phun kơphê, kơ su... mơnuih ƀôn sang amăng plơi, biă ñu 35 bôh sang anô̆ gah sang anô̆ ƀun rin hrăm ngă tui. Amai Y Xang, Khua Khul pơlir hơbit đah kơmơi să Dăk Kôi, mơnuih ping gah jơnum ƀơi plơi Trăng Nó Kon Blo brơi thâo, gơnang kơ dưi hmâo mơnuih ping gah djă tơngan črâo bruă, abih pran jua pơtô ba, hơdôm bôh sang anô̆ gah ƀun rin tơnap hloh plơi, kah hăng A Dĩa, A Thế, A Long... ră anai phing kơ pran, khin hơtai tuh pơplai pơđĭ kyar bơwih ƀong huă hmâo dong prăk pơhrui glăi kơ sang anô̆:

 “Ƀing ping gah juăt nao tơl sang kiăng lăi pơhing hơdôm hơdră ngă gơgrong amăng bruă pơđĭ kyar bơwih ƀong ăt kah hăng hơdôm hơdră pơtrun hơdră bruă mơng Ping gah, tơlơi phiăn Kơnuk kơna. Pơtô brơi neh wa pơplih tơlơi pơmin ăt kah hăng tơlơi pơmin amăng bruă pơplih hơdră phun pla hlô rông nao hrŏm hăng Bruă pơsur Ngă pơplih tơlơi pơmin hơdră ngă mơ̆ng neh wa djuai ania biă, ngă brơi neh wa djuai ania ƀiă hrưn đĭ tơtlaih mơ̆ng ƀun rin kơjăp phik”.

Đăk Kôi lĕ sa kual asuek tơring glông Kon Braih hăng abih bang mrô mơnuih ƀôn sang giăm truh 3.400 čô mơnuih, amăng anun djuai ania Hơdang hmâo 94%. Ơi Trương Hồng Doanh, Khua git gai Ping gah să Đăk Kôi brơi thâo, truh rơnuč thun 2022 să dô̆ truh kơ 285 bôh sang anô̆ ƀun rin hmâo rơbêh kơ 34% mrô sang anô̆ mơnuih ƀôn sang. Ƀơi anăp bôh nik anun, Ping gah să pơsit pran jua pơtrut kơtang Bruă pơsur “Ngă pơplih tơlơi pơmin, pơplih bruă ngă mơng neh wa djuai ania ƀiă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik”. Pơsit bruă ngă gru hlâo mơng ping gah, Ping gah să Đăk Kôi pơpha bruă mă kơ 15 Grŭp Ping gah hăng rơđah truh 187 čô mơnuih ping gah să, amăng anun biă ñu đing nao truh bruă mă ba jơlan hlâo mơ̆ng mơnuih ping gah djuai ania ƀiă:

 “Ping gah să ră anai yap gah mrô mơnuih ping gah lĕ djuai ania ƀiă hmâo lu biă, hăng 156 čô mơnuih ping gah dưm dưm hăng 83,42%. Hăng bruă mă lĕ sa mơnuih ping gah lĕ ƀing ping gah ƀơi anai ngă tui tơhnal ba jơlan hlâo mơ̆ng mơnuih ping gah. Pok pơhai bruă pơsur ngă pơplih tơlơi pơmin, bruă ngă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik amăng hơdôm thun rơgao mơnuih ping gah mơ̆ng hơdôm grŭp plơi pla mơ̆, biă ñu mơnuih ping gah djuai ania ƀiă hmâo pơphun lăi pơhing pơsur neh wa anăp nao gum hrŏm klă”.

Lar hyu Bruă pơsur “Ngă pơplih tơlơi pơmin, pơplih bruă ngă mơng neh wa djuai ania ƀiă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik” yua kơ Ping gah tơring čar Kon Tum črâo ba, Ping gah tơring glông Kon Braih pơplih rơđah laih bôh yôm pơsur hăng hmâo lu jơlan pok pơhai ngă tui. Ƀơi 43 bôh plơi djuai ania ƀiă mơnuih ping gah đing nao pơsur, pơtô ba sang anô̆ djuai ania ƀiă hăng ƀun rin ƀơƀiă mă yua ba glăi bôh tơhnal ngăn rơnoh mơ̆ng sang anô̆, ngăn rơnoh čan pioh pơđĭ kyar bơwih ƀong; tơhnal pơkă lăp djơ̆ kiăng pơƀut prăk tuh pơplai glăi bruă ngă đang hmua; tơlơi pơhing kơ djop djuai pơjeh, phun pla, hlô rông lăp djơ̆; anom mă bruă hrŏm pla phun jrao, pơđĭ kyar bruă đang hmua hơdjă... Ơi Nguyễn Văn Thủy, Kơ-iăng Khua Jơnum min mơnuih ƀôn sang tơring glông Kon Braih, pơtŏng sit bruă pơsur hmâo ba glăi laih bôh tơhnal rơđah amăng pơđĭ kyar bơwih ƀong – mơnuih mơnam mơng tơring glông:

 “Mơnuih ƀôn sang hmâo pơplih laih amăng hơdră ngă, amăng mă yua bôh thâo phrâo amăng bruă ngă đang hmua ăt kah hăng rông hlô ngă brơi tơlơi hơdip mơnuih ƀôn sang ƀơi kual plơi pla jai hrơi jai pơplih phrâo, biă ñu neh wa djuai ania ƀiă. Hluai tui bruă pok pơhai ngă tui hơdôm hơdră ngă đang hmua, laih anun pơhrua hrŏm ngă tui hơdôm jơlan hơdră pơkă mơ̆ng dêh čar kơ neh wa djuai ania ƀiă hmâo pơjing rai laih hơdôm tơlơi pơplih rơđah hăng ba glăi bôh tơhnal anun lĕ tơlơi hơdip mơda hăng tơlơi pơmin neh wah djuai aniă ƀiă hmâo laih hơdôm tơlơi pơplih rơđah”.

Tui hăng ơi Nguyễn Quang Thạc, Khua git gai Ping gah tơring glông Kon Braih, tơdơi rơbêh kơ 2 thun pok pơhai ngă tui, Bruă pơsur “Ngă pơplih tơlơi pơmin, pơplih bruă ngă mơng neh wa djuai ania ƀiă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik” hmâo amăng ƀrư̆ bơdjơ̆ nao tơlơi pơmin mơ̆ng mơnuih ƀôn sang, ba glăi bôh tơhnal sit nik. Hmâo rơbêh kơ 30% mrô sang anô̆ mơnuih ƀôn sang ƀun rin, ƀun rin ƀơƀiă ƀơi tơring glông glông pơplih klă tơlơi pơmin, lui tui ƀơƀrư̆ phiăn juăt sô hơđăp ƀu tŭ yua, ƀu ah gơnang kơ tơlơi gum djru mơng Kơnuk kơna gơgrong pô tơtlaih mơ̆ng ƀun rin kơjăp phik; rơbêh kơ 39% mrô sang anô̆ thâo mă yua bôh thâo phrâo amăng bruă ngă đang hmua, ruah mă phun pla, hlô rông hmâo nua yôm, lăp djơ̆; giăm hmâo 17% mrô sang anô̆ hmâo tơlơi hơdip mơda gơnam tam, pran jua dưi pơplih phrâo hmâo rơnoh pơhrui glăi prăk lu hloh rơnoh hơnong ñu mơng djuai ania ƀiă amăng tơring glông.

Ngă tui bôh tơhnal dưi ngă kiăng Pơsur “Ngă pơplih tơlơi pơmin, pơplih bruă ngă mơng neh wa djuai ania ƀiă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik” mut dơlăm, ba glăi bôh tơhnal, sit nik, Ping gah tơring glông Kon Braih pơsit sa amăng hơdôm jơlan pơsir yôm phăn lĕ pơđĭ tui dong bruă mă, bruă gơgrong mơng gưl ping gah gơgrong gah grŭp ping gah, mơnuih ping gah gơgrong gah sang anô̆, grŭp sang anô̆ hăng mơnuih hmâo arăng đăo gơnang, mơbruă amăng plơi pla./.