Să Tu Mrông (tơring čar Quảng Ngãi) dưi pơjing hluai tui gru pơmut hrŏm anom mă bruă čar mơ̆ng 2 bôh să Tu Mrông hăng Đăk Hà (tơring čar Kon Tum hơđăp). Ră anai să hmâo 17 bôh plơi, mrô mơnuih ƀôn sang giăm truh 6.500 čô mơnuih. Ping gah să hmâo 26 grŭp ping gah hăng rơbêh kơ 300 čô mơnuih ping gah. Tơdơi kơ gong gai 2 gưl mă bruă, Ping gah să pơphun bưp ƀô̆ mơta mơnuih apăn bruă, mơnuih mă bruă hăng 2 tơlơi pơhing phun dưi ba tơbiă: “Hơđong tơlơi pơmin, pơphun bruă – Ngă tui pran jua gum hrŏm hơbit” hăng “Pơđĭ dlông bruă mă bơwih brơi kơ mơnuih ƀôn sang – Pơtrut kơtang pơplih bruă hră pơ-ar”.

Hrŏm hăng anun, Ping gah să ăt tañ prăp lui mơn kơ bruă pơphun Jơnum tal 18, rơwang bruă 2025-2030 pioh pơjing yak nao pơplih phrâo amăng pơđĭ kyar bơwih ƀong – mơnuih mơnam. Ơi Võ Trung Mạnh, Khua git gai Ping gah să Tu Mrông, brơi thâo:

“Să phrâo pơsit pơđĭ kyar anom mă yua, bơwih bruă pioh čơkă tuai nao čuă lăng đang sâm Ngọc Linh, laih anun pơphun hơdôm mông pơdă sĭ sâm. Să ăt hmâo pơsit mơn hơdôm anih anom pioh pơđĭ kyar tuai čuă ngui ƀơi să, pơđĭ kyar bruă tuai čuă ngui lông lăng ƀơi Đăk Chum 1. Să ăt hmâo pơsit mơn pơlar phun jrao lĕ phun ñu. Rơngiao kơ sâm Ngọc Linh amra pơlar hơdôm djuai phun sâm pơkon pioh ngă gal brơi bơhmu nao, hrŏm hăng anun hluai tui anun pơgang anăn păn sâm Ngọc Linh ƀơi să”.

Hrŏm hăng mă bruă hluh gah bruă gong gai, hơdôm bôh să kual čư̆ siăng tơring čar Quảng Ngãi glăk pơdah pran jua gơgrong hlâo, tañ prăp lui tŏng ten kơ Jơnum Ping gah rơwang bruă phrâo 2025-2030, tui djơ̆ pran jua črâo ba mơ̆ng Khua git gai Ping gah dêh čar ơi Tô Lâm lơm hmâo tal nao čuă hăng mă bruă ƀơi tơring čar. Anun lĕ ngă tui tơpă Tơlơi črâo ba mrô 45; čih tơlơi lăi pơthâo glăi bruă kơđi čar hăng bôh nik tơdơi kơ pơmut hrom; hmâo tơlơi kiăng lăi, tơhnal lăng rơđah rơđông, pơsit hơdôm bruă pơplih phrâo, bruă jao phun hăng tơhnal pơđĭ kyar rơđah.

Ơi Nguyễn Đức Tuy, Kơ-iăng Khua git gai Ping gah, Khua Khul khua pơ ala mơnuih ƀôn sang tơring čar Quảng Ngãi, brơi thâo:

“Tơlơi lăi pơthâo glăi kơđi čar pơdah tơhnal pơplih phrâo, pran pơsit pioh pok pơhai amăng rơwang bruă pơ̆ anăp. Anih anom pơđĭ kyar prong anun tơhnal mơ̆ng să ră anai lĕ ngă tui samơ̆ rơwang bruă prong hloh. Hluh rơđah kual hơpă hmâo bruă mă hiưm ñu hơdai nao prăk mut amăng tơlơi lăi pơthâo glăi kơđi čar pioh nao djơ̆ jơlan gah pioh pơđĭ kyar hăng pơđĭ tui tơlơi hơdip mơda gơnam tam hăng pran jua kơ mơnuih ƀôn sang, biă ñu lĕ kual neh wa djuai ania ƀiă”.

Jơnum Ping gah hơdôm bôh să kual čư̆ siăng Kon Tum gah tơring čar Quảng Ngãi amra jing tơhnal gal pioh hơdôm anih anom pơsit glăi tơhnal lăng pơđĭ kyar, ruah djơ̆ bruă pơplih phrâo, ngă tui anô̆ gal kual pioh pơplih phrâo tơhnal pơđĭ kyar tañ, kơjăp phik amăng rơwang phrâo./.