Ping gah tơring čar Dak Lak pơphun jơnum tal blung a Khul git gai ngă tui hơnong pơkă pơđĭ kyar dua mrô rơwang thun 2026-2030
Thứ năm, 11:03, 02/04/2026
VOV Tây Nguyên/Siu Đoan Pơblang
VOV Tây Nguyên/Siu Đoan Pơblang
VOV.Jarai-Tom brơi (1/4), Ping gah tơring čar Dak Lak jơnum tal blung a Khul git gai ngă tui hơnong pơkă pơđĭ kyar dua mrô rơwang thun 2026-2030, pơčrông sai hơdră pơsir hĭ hơdôm tơlơi gun mơng rơwang blung a thun anai lơm lu hơnong pơkă aka ƀu dưi ngă tui jơlan gah ba tơbiă.
Tui jơlan gah pơđĭ kyar, rơwang thun 2026-2030, Dak Lak ba tơbiă hơnong pơkă pơđĭ kyar mơng 11-11,5% ha thun; mrô GRDP 5 thun him lăng giăm 700 rơbâo klai prăk. Tui pơkă lăng rĭm thun lêng pơđĭ kyar dua mrô, mơng 10,2% thun 2026 đĭ 12% amăng thun 2030.
Ƀơi anăp kơ tơlơi rơkâo pơđĭ kyar dua mrô lơm hơmâo anih bơwih ƀong phun đĭ dŏ kaih, ơi Lương Nguyễn Minh Triết, Khua git gai Ping gah tơring čar Dak Lak rơkâo kiăng hơmâo hơdră pơtrut kơtang, sit biă ñu amăng pơplih ngă hră pơ-ar hăng pơhưč tuh pơ alin klă hloh. Laih dong, kiăng hơmâo tơhnal pơkă phara, tañ amăng pok pơhai ngă tui hơdôm akŏ bruă pơprong, ngă pơtrut pơđĭ kyar dong mơng thun 2026 mơtăm.
Viết bình luận