Tlam lơ 30/10, Keh prăk pơgăn tơlơi ruă nuă djai brŭ kual ASIA iâu klah čun keh prăk AIP ngă hrŏm Khul wai lăng rơnuk rơnua jơlan glông tơring čar Gia Lai pơphun jơnum pơƀut bruă mă 5 thun ngă tui kơčăo bruă “Pơhrŏ tơlơi hmar-Sang hră rơnuk rơnua" ƀơi plơi prong Plei Ku. Jơnum anai pơtong glăi, tơdơi kơ 5 thun pok pơhai kơčăo bruă, plơi prong Plei Ku jing plơi prong ba gru hlâo amăng kual sang hră rơnuk rơnua tơring čar hăng kual Dap Kơdư.

Tui hăng tơlơi pơtong glăi mơ̆ng Gơnong bruă Jơlan glông hăng Pơdŭ pơgiăng Gia Lai, tơdơi kơ 5 thun pok pơhai kơčăo bruă, ƀơi plơi prong Plei Ku hơmâo 33 boh sang hră gưl sa dưi ming pơkra klă hiam jơlan rơbat nao rai, anih giăm sang čơ, anih nao čơkă čơđai sang hră tơbiă mơ̆ng anih hrăm kiăng huăi hơmâo tơlơi truh hơgĕt ôh; pơkă hnong rơdêh đuăi rơnang hloh amăng anih lu mơnuih găn rơgao nao rai, ƀơi anăp amăng jang sang hră, rơdêh kơnong đuăi rơnang 30 km sa mông gah rơngiao plơi prong lĕ đuăi rơnang 40 km sa mông. Amăng mrô anun, hơmâo 71% dưi pơsit tơlơi rơnuk rơnua rơnoh mrô 5 pơtŭ. Kơčăo bruă djru pơhrŏ ƀiă tơlơi truh sat rơdêh pơjrom hăng mrô mơnuih djai yua rơdêh pơjrom amăng kual jĕ giăm sang hră. Ră anai, tơring čar ăt hơmâo akŏ bruă man pơkra glăi 56 boh sang hră treng jơlan tơring čar kơñ pơgi hăng anăp nao pok pơhai hơdră ngă tui hơbô̆ bruă anai đơ đam tơring čar, boh nik ñu pơ kual ataih, kual tơnap tap.