Hơdôm hrơi anai, rôk tui hơdôm ară jơlan ƀơi An Nhơn Bắc amra bưp mơnuih ƀôn sang glăk bơwih brơi, dưm amăng ƀưh blŏ hăng pleh hĭ hla bơnga. Anai lĕ bruă mă yôm phăn kiăng pơhlôm brơi phun bơnga amra bluh bơnga djơ̆ hrơi hăng sĭ hơmâo nua amăng bơyan ƀong tết anai. Ayong Ngô Văn Hào, dŏ ƀơi ƀut plơi Trung Lý, phường An Nhơn Bắc, mơnuih hơmâo rơbêh 15 thun pơlir hăng bruă pla bơnga dar kơñĭ brơi thâo, sang anŏ gơñu ră anai hơmâo rơbêh 3.000 phun bơnga dar kơñĭ djop mơta, lu hloh lĕ bơnga dar kơñĭ phun rup ania čơgrai, bơnga pơtlep than hăng bơnga bonsai.

“Rơwang anai hơdôm anih pla dưm dăp glăi phun pla, ruah hơdôm phun bơnga hiam hloh dưm dăp glăi, phun bơnga hơpă ƀu hiam pioh thun tơdơi dong sĭ, ră anai neh met wa hơmâo pơdŭ pơgiăng nao phun bơnga pơ anih sĭ pơƀut jum dar Jơnum min mơnuih ƀôn sang phường pioh anih sĭ bơnga. Ră anai hơdôm đang pla bơnga ăt glăk ječ ameč dưm bơng amăng ƀưh blŏ hăng bơwih brơi ñu bluh đĭ hiam yua anun ră anai neh met wa glăk ngă bruă hmar hloh”.

Hrŏm hrơi mông mă bruă ječ ameč, ayong Ngô Minh Trí, dŏ amăng ƀut plơi Trung Lý, phường An Nhơn Bắc, pla giăm 2.000 phun bơnga dar kơñĭ anet prong hơmâo soh, him lăng ba sĭ giăm 600 phun amăng bơnga ngui ƀong tết anai. Ñu brơi thâo, tơdơi kơ hơjan ia ling dăo, bruă bơwih brơi phun bơnga dar kơñĭ ăt glêh glar ƀiă, samơ̆ yua ayuh hiăng gêh gal, phun bơnga ăt bluh đĭ hiam. Tui ayong Trí, hơdôm thun giăm anai, mơnuih kiăng blơi bơnga dar kơñĭ bonsai jai hrơi lu tui yua phun bơnga ñu anet hiam, amuñ dưm pơdă.

“Ră anai glăk bơwih brơi phun bơnga hăng pleh hĭ hla, nua sĭ mơng 500 rơbâo truh pơ hơdôm klăk ha phun. Bơnga bosai ñu anet anun dưi dưm ƀơi kơƀang mă bruă, phun bơnga dar kơñĭ hơmâo djop mơta samơ̆ ră anai bonsai lĕ arăng kiăng hloh. Dưi pla bơnga tui anai mă mơng phun bơnga rup anai čơgrai ƀudah phun lu than anun arăng trơ̆i hĭ thun, ƀư̆ glăi kiăng rơngiă hơdôm thun kah mơng hơmâo bơnga dar kơñĭ bonsai”.

Lơm anun hăng hơdôm anih pla sui thun, tơlơi pơplih tui pran hor ăt glăk ba glăi lu tơlơi glêh tơnap. Ơi Lê Văn Tuấn, dŏ amăng phường An Nhơn Bắc, mơnuih hơmâo rơbêh 40 thun pla bơnga dar kơñĭ, ră anai glăk pla giăm 500 phun bơnga dar rup ania čơgrai, amăng anun lĕ phun bơnga sui hơdôm hơpluh thun.

“Bơnga dar kơñĭ ba sĭ mơdrô hơmâo lu mơta ƀiă hlâo adih, hlâo adih bư̆ jing rup hiam ƀiă đôč, hlâo adih pla tui rup ania čơgrai lĕ lu hloh. Phun bơnga kâo pla đa 20 thun, đa 30 thun, phun ƀiă thun hloh lĕ 6 thun, ră anai pơplih ăt ƀu dưi, kâo ăt tha laih, mơ̆ kiăng bư̆ jing sa phun bonsai ăt ƀu amuñ lơi”.

Phường An Nhơn Bắc, tơring čar Gia Lai akŏ pơjing hluai tui bruă pơmut hrŏm hơdôm boh phường, să amăng plơi prong An Nhơn, tơring čar Bình Định hơđăp, ră anai lĕ tơring čar Gia Lai. Anai arăng lăng lĕ kual pla bơnga dar kơñĭ lu hloh hăng hmư̆ hing ƀơi kual Tong krah, hăng rơbêh 450 boh sang anŏ, prong đơ đam 145 ektar, ba glăi pơhrui rơbêh 100 klai prăk rĭm thun.

Kơthel mrô 13 (blan 11/2025) hrŏm hăng hơjan ia ling dăo ngă răm rai kơtang ƀơi hơdôm kual pla bơnga phun amăng tơring čar Gia Lai, amăng anun hơmâo phường An Nhơn Bắc. Ia ling dăo ƀơi hơdôm anih pla bơnga dar kơñĭ, tơdơi anun pioh glăi hơdôm phun bơnga hlŭ klom, buč akha, preo than. Samơ̆, tơdơi kơ ia đoh, mơnuih pla bơnga ječ ameč rŭ pla glăi. Rĭm blah đang pla bơnga dar kơñĭ pơkra glăi lŏn, trơ̆i hĭ than sat, bơwih brơi akha. Hơdôm phun bơnga dar kơñĭ him lăng ƀu dưi hơdip dong tah glăk bluh mơtah glăi, bơnga wil hiam, čơkă bơyan bơnga phrâo hăng ba glăi tơlơi čang rơmang sa bơyan ƀong tết bă blai.

Ơi Đinh Thanh Trình, kơ-iăng Khua Jơnum min mơnuih ƀôn sang phường An Nhơn Bắc brơi thâo, hơjan ia ling dăo thun rơgao ngă giăm 120.000 phun bơnga dar kơñĭ bơdjơ̆ nao, him lăng rơngiă rơbêh 80 klai prăk. Ƀơi anăp tơlơi sit nik anun, gong gai ƀon lan hơmâo pok pơhai lu hơdră djru brơi mơnuih ƀôn sang rŭ glăi pla pơjing.

“Kiăng gêh gal brơi neh met wa pla pơjing hăng sĭ bơnga dar bơyan tết, anom bruă hơmâo ngă tui hơdôm hơdră djru amăng anun lui ƀudah hrŏ ƀiă duh prăk yua apah anih sĭ, ngă gêh gal brơi hơdôm rơdêh mơng hơdôm boh tơring čar kual Dơnung-Kơdư nao blơi bơnga, ngă gêh gal brơi kơ tuai nao blơi bơnga dar kơñĭ amăng ƀon lan. Laih dong hơmâo lu hơdră djru kiăng pơphô bruă brơi gưl glông, sang bruă prăk bong lui rơnoh prăk đôm, ƀudah brơi čan mă kmlai ƀiă kiăng neh met wa gêh gal hăng hơmâo prăk tuh pơ alin pla glăi”.

Amăng hơdôm đang pla bơnga glăk amăng bơyan sĭ, jua mơñi mơng thong kăp than, pruih ia hrŏm amăng pơ-iă yang hrơi tlam ba glăi rup rap mă bruă dik dak, bă blai tơlơi čang rơmang. Hăng mơnuih pla bơnga dar kơñĭ An Nhơn Bắc, bơyan sĭ bơnga Tết Bính Ngọ 2026 ƀu djơ̆ kơnong lĕ bơyan sĭ mơdrô đôč ôh mơ̆ ăt pơdah tơlơi gir run găn rơgao ayuh hyiăng pơplih sat, kiăng rĭm than bơnga bluh rai djơ̆ hrơi djă ba sa bơyan bơnga phrâo hăng lu tơlơi čang rơmang./.