Ngă tui tơlơi gir run mơ̆ng Ding jum kơđi čar, blan 3 thun 1975, bruă Tơgŭ blah hăng ngă hơkrŭ mơ̆ng tơhan hăng mơnuih ƀôn sang ta bơyan phang 1975 pok pơphun hăng truh kih, blah dưi na nao. 3 anih blah yôm phun: Blah kual Dap Kơdư pơphun hăng tơlơi kơsung blah sua glăi Buôn Ma Thuột, pơklaih rơngai kual Dap Kơdư; blah rơngai Huế - Đà Nẵng hăng Blah ngă djă anăn Hồ Chí Minh pơklaih rơngai Sài Gòn - Gia Định.

Hơdôm hrơi tuč rơnuč mơ̆ng bruă blah ngă, mah ƀing ayăt hơmâo ƀing ta blah prai, samơ̆ gơñu ăt ĕp jơlan gir bong glăi, pơgăn tơhan ta kơsung blah. Lơ 26/4/1975, tơdơi kơ hrơi blan blah hơdeč hmar, ƀrô ba hyu tơhan ƀrô blah ayăt, ƀrô pơhrui tui tơhan rah, 5 grup tơhan blah phun mơ̆ng Tơhan pơklaih rơngai kah jing 5 grup ha amăng plĕ kơsung blah pơ Sài Gòn - Gia Định.

Truh 11h30 lơ 30/4/1975, Khua mir sir Dương Văn Minh hăng abih bang gong gai Việt Nam Cộng hòa khŏm pơdơi blah, yor tơngan, ngă tui tơlơi ƀing ta kiăng. Bruă blah ngă djă anăn Hồ Chí Minh truh kih laih.

Blah rơngai bơyan phang 1975 kơđŏm gru tơlơi pơsit, ba djuai ania ta hơyak amăng rơnuk rơngai, pơlir hơbit, xã hội chủ nghĩa, laih dong pơsur kơtang biă kơ bruă hơkrŭ djuai ania hăng blah ngă yua kơ tơlơi rơngao, pơplih phrâo ƀơi rŏng lŏn tơnah. Đại tướng Phan Văn Giang, Ding kơna ding jum kơđi čar, Kơ-iăng khua Ping gah khul tơhan, Khua ding jum ling tơhan pơsit: "Krĕp 11 mông 30 mơnit lơ 30/4/1975, Bruă hơkrŭ Hồ Chí Minh truh kih laih, pơđut bruă blah ayăt Mi, sua glăi lŏn ia. Anun jing boh than djơ̆ hăng thun blan blah ayăt tơnap tap, lông lăng hăng tơlơi djai rơngiă prong biă mă mơ̆ng tơhan hăng mơnuih ƀôn sang ta. Blah rơngai bơyan phang thun 1975 pơsit brơi jơlan ngă hơkrŭ prăp rơmet hlâo, pơčeh phrâo, tơlơi git gai lăp djơ̆ mơ̆ng Ping gah; jing tơlơi truh kih mơ̆ng pran blah ngă mơ̆ng mơnuih ƀôn sang, pơdah pơƀuh tơlơi pơmin khăp kơ lŏn ia pơlir kjăp hăng tơlơi pơmin pơlir hơbit lŏn ia hăng čang rơmang rơnuk rơnua, mơ̆ng pran jua gum pơgôp djuai ania, pơlir hăng pran kơtang mơ̆ng rơnuk pơplih phrâo".

Tơdơi kơ ha mơkrah rơnuk thun, dêh čar ta ăt pơtrut tui boh than hơmâo ngă hăng tơlơi răk pioh, kơđiăng lui mơ̆ng hrơi Blah dưi bơyan phang 1975, mut nao amăng rơnuk phrâo, hrưn đĭ tơlơi pơdrong sah, kjăp kơtang, “mơnuih ƀôn sang pơdrong, lŏn ia kơtang, mơnuih ƀôn sang ngă pô, dưm kơnar, thâo rơgơi”./.