Amăng mông kơkuh hăng pran jua tơpă khut khăt pơpŭ yôm, hăng tơlơi adoh anăn Hồ tử sĩ, bơngăt ƀing tơhan pơsăn drơi jăn yua kơ lŏn ia, kiăng hơdor tơngia laih anun h’ŭ glăi, rơbêh 30 čô čơđai sang hră ƀing hrăm thâo, ba gru hlâo ƀơi 7 boh să dŏ giăm guai dêh čar tơring čar Dak Nông, dŏ dong dăp glông kơkuh pơpŭ hăng ba nao guang bơnga pơyơr ƀơi Gong kut hơdor kơ ƀing tơhan khin hơtai djai pơsăn drơi jăn yua kơ lŏn ia mơ̆ng Puih kơđông tơhan pơgang guai dêh čar či amăng jang Bu Prăng, să Bu Prăng, tơring glông Tuy Đức. Anai lĕ sa črăn amăng hơdră hrăm “Mông hrăm kơ guai dêh čar” yua tơhan pơgang guai dêh čar tơring čar Tuy Đức pô pơphun pioh pơtô brơi kơ ƀing čơđai sang hră. Pơ anai, ƀing ană amôn čơđai sang hră hmư̆ ră ruai glăi thun blan rơgao blah ngă, tuh drah pơčah asar mơ̆ng ƀing met ayong anong wa ngă tơhan pơgang guai dêh čar, biă mă ñu 16 čô tơhan pơsăn drơi jăn mơ̆ng puih kơđông tơhan pơgang guai dêh čar či amăng jang Bu Prăng khin hơtai blah ayăt tơl tơdjôh drah tuč rơnuč kiăng pơgang guai dêh čar ƀơi Bu Prăng. Hơdôm tơlơi thâo kơ gru grua đưm dêh čar sa kông ngăn yôm tơlơi thâo dơlăm kơ čơđai sang hră, hmư̆ dol kơdol dlưh pran jua biă mă, kiăng pơtrut pơsur pran jua ƀing gơñu thâo khăp kơ lŏn ia, pơpŭ kơ bruă ngă pơgang dêh čar. Amôn Y Dũng, čơđai sang hră hrăm anih 7A5, Sang hră gưl II Nguyễn Huệ, să Thuận An, tơring glông Dak Mil, ană rông mơ̆ng puih kơđông tơhan pơgang guai dêh čar Thuận An lăi:

“Hơmâo mut hrŏm anih pơtô ĕp lăng thâo hluh kơ gong gai hlă pơkă jơlan guai dêh čar kâo ƀuh lăp pơ-ư ang biă mă kơ lŏn ia ta khăp ƀu eng. Kâo kiăng hơmâo mông hrăm pơtô glăi tơlơi thâo hrup anai lu hloh. Tơdơi anai, prong laih kâo kiăng ngă tơhan kah hăng ƀing met anong, pioh pơgang gong gai hlă pơkă guai dêh čar laih anun pơgang lŏn ia ta pô”.

Ngă hrŏm hơdră anăn “Hrăm kơ jơlan guai dêh čar”, hrŏm hăng bruă nao čuh ñang, pơyơr gơnam, guang bơnga ƀơi gong kut gong klao ƀing tơhan djai pơsăn drơi jăn yua kơ lŏn ia, ƀing ană amôn čơđai sang hră hrŏm hăng ƀing nai pơtô jing ƀing met ayong anong wa akă grat ia mơtah hyu sem, ĕp lăng, găn rơgao amăng jơlan guai dêh čar, kiăng thâo hluh bruă hyu tir pơgang guai dêh čar, pơgang tơmeh ƀudah gong gai hlă pơkă guai dêh čar, kiăng ĕp lăng, sem hơduah djop mơnuih, rơdêh găn rơgao nao rai amăng jơlan ƀơi guai dêh čar. Ƀuh ƀơi anapw mơta bruă mă, hyu tir, yua amăng hơdrôm hră pơtô hrăm aka ƀu hơmâo tơlơi čih ră ruai pơthâo djop ôh kơ bruă mă yôm kơ lŏn ia hăng boh yôm phun pơbŭ đĭ tơlơi khăp ƀu eng kơ lŏn ia dêh čar laih anun pơđĭ tui pran jua pơtrut hrăm hră pơar. Tal blung a ngă hrŏm mông pơtô hrăm kơ guai dêh čar ƀơi gong tơmeh mrô 55, amôn Triệu Thị Cẩm Nhung, čơđai sang hră hrăm anih 9A, sang hră gưl sa hăng gưl dua Bế Văn Đàn, să Thuận Hà, tơring glông Dak Song hok mơak biă mă kơ anih hrăm sit nik tui anai.

“Kâo ƀuh mông hrăm djơh hăng anai mơak biă mă hơmâo lu tơlơi hrăm găn rơgao sit nik lu hloh tơlơi hrăm amăng sang hră. Lơ̆m dưi hyu ĕp lăng sit nik tui anai, hơmâo hrăm tui bruă ƀơi anai, kâo ƀuh pran jua thâo khăp kơ lŏn ia jai kơtang hloh hăng ƀuh pran jua ta mơak, gơgrong ba kơ bruă wai pơgang guai dêh čar”.

Thun anai lĕ thun blung a hơdră Mông hrăm kơ guai dêh čar dưi hơmâo ƀing tơhan pơgang guai dêh čar tơring čar Dak Nông pơphun ƀơi djop puih kơđông tơhan pơgang guai dêh čar amăng 7 boh să giăm guai gah 4 boh tơring glông Čư̆ Jŭt, Dak Mil, Dak Song hăng Tuy Đức. Hlâo kơ anun, mơ̆ng thun 2018, puih kơđông tơhan pơgang guai dêh čar ƀơi Tuy Đức, tơring glông Tuy Đức lĕ anom bruă blung a mơ̆ng tơring čar pơphun hơdră anai hăng anăn iâu lĕ tơlơi hrăm kơ guai dêh čar. Giăm 7 thun anom bruă anai pơphun hơdră ngă tŭ yua djơh hăng anai. Khua tơhan thiếu tá, Nguyễn Văn Nga, apăn bruă kơđi čar puih kơđông Tuy Đức brơi thâo, kơnang kơ hơdră anai čang rơmang djru hrŏm hăng mơnuih ƀôn sang, čơđai sang hră thâo hluh tong ten hơdôm djop mơta bruă amăng kual lŏn guai dêh čar, bruă mă hyu tir, ĕp lăng mơnuih mơnam găn rơgao nao rai; thâo hluh bruă mă mơ̆ng ƀing tơhan pơgang guai dêh čar. Laih dơ̆ng, mơ̆ng anun kiăng pơtrut pơsur pran jua, bruă mă bang hyu tơlơi khăp kơ lŏn ia brơi mơnuih ƀôn sang hăng čơđai sang hră ƀơi guai dêh čar.

“Ăt čang rơmang bruă ngă anai bang bơngač lu hloh amăng kual guai dêh čar, thâo hluh kơ bruă ngă pô lŏn ia brơi kơ ană amôn čơđai sang hră. Ƀing gơmơi ăt kiăng pơtô glăi, pơtrut pơsur pran jua kơ djop gưl rơnuk ană amôn čơ đai sang hăng mơnuih ƀôn sang ƀu kơnong amăng kual guai dêh čar đôc ôh, wơ̆t hăng djop să amăng lăm lŏn ia ngă hrŏm gum tơngan djru pơgang lŏn ia, jơlan guai dêh čar, tơmeh gong pơkă guai dêh čar”.

Hơdôm mông hrăm ƀơi guai dêh čar lĕ tŭ yua biă mă, amăng bruă pơtô ba ngă bơngač tui bruă gơgrong ba ƀơi djop să kual giăm guai dêh čar či tơring čar Dak Nông. Mơ̆ng anun, djop mông hrăm anai hơmâo djru kơ ƀing čơđai sang hră thâo sit nik amăng bruă mă laih dơ̆ng pơtrut pơsur pran jua thâo khăp kơ lŏn ia plơi pla, pơđĭ tui tơlơi pơmin, pran jua hor hloh bơkơtuan mă bruă khăp kơ lŏn ia, kơtưn ngă bruă, hrăm hră pơar kiăng jing mơnuih tŭ yua kơ plơi pla. Ăt yua mơ̆ng anun  mơ̆n, djru hrŏm akŏ pơjing tơdron blah amăng lăm pran jua ƀing dŏ ƀơi guai dêh čar lŏn ia kjăp phik.