Đĭ pơhiăp amăng mông bưp, Khua git gai Ping gah, khua mir sir ơi Tập Cận Bình brơi thâo, sui mơng anai krĕp ha thun hrŏm hăng Khua git gai Ping gah, Khua mir sir ơi Tô Lâm pok jơlan hơdră Glông jơlan mriah kơsem min, kiăo tui hrăm, truh ră anai hlăk ai 2 boh dêh čar hơmâo lu tơlơi pơhrăm nao rai dua bơnah, tŏ tui gum pơgôp, gơgrong hơmâo lu tơlơi pơgôp ƀiă dong amăng hrơi blan dua boh dêh čar Việt Nam-Khač gum hrŏm yak tui jơlan pơplih phrâo, gum hrŏm pơtrut kơtang hơdôm bruă pơplih pơčeh phrâo, pok phư ngă hrŏm hăng ba glăi tơlơi truh kih hrŏm.

Gah dêh čar ta, Khua git gai Ping gah, Khua mir sir ơi Tô Lâm brơi thâo, hlăk ai 2 boh dêh čar kiăng pơ-ư ang hăng lăng yôm tơlơi rô nao rai “ƀing ngă gŏp, ƀing adơi ayong” kơplah wah dua Ping gah hăng mơnuih ƀôn sang dua boh dêh čar Việt Nam-Khač yua Khua mir sir Hồ Chí Minh hăng Khua mir sir Mao Trạch Đông hrŏm hăng djop rơnuk ngă hơkrŭ dua bơnah bôr đĭ. Ñu čang rơmang rơnuk hlăk ai dua bơnah kjăp bruă kơđi čar, tơlơi pơmĭn; kơtưn bruă pơhrăm, tŏ tui pơplih pơčeh phrâo, ngă pô amăng yua boh thâo ia rơgơi, lêng kơ ba jơlan hlâo, pơgôp amăng bruă pơđĭ kyar ƀơi rĭm boh dêh čar hăng tơlơi rô nao rai giang mah kơplah wah Việt Nam-Khač.

Ăt amăng yang hrơi dong lơ 15/4, Khua git gai Ping gah, Khua mir sir ơi Tô Lâm hăng Khua git gai Ping gah, Khua mir sir Khač ơi Tập Cận Bình nao lăng mông kĭ hơdôm pok hră ngă hrŏm kơplah wah hơdôm ding jum, gơnong bruă, ƀon lan dua boh dêh čar.