Kông ty pơčruh ngăn pơkra pơsơi Thép Hòa Phát Dung Quất lĕ sa, amăng hơdôm sang bruă mơdrô prong, apah lu mơnuih mă bruă hăng djru hrŏm yom biă mă măng rơnoh pơđĭ kyar tuh tia pơkra ming hăng măi mok tơring čar Quảng Ngãi. Ră anai, kông ty hơmâo 3 kơčăo bruă hlăk mă bruă amăng đơ đam tơring čar Quảng Ngãi, kah hăng: Anih lir hơbit tuh tia pơkra ming eh pơsơi jing pơsơi kuăt Thép Hoà Phát Dung Quất 1; Anih lir hơbit pơkra ming pơsơi Hoà Phát Dung Quất 2; Kơčăo bruă tơdrun kompan lu mơta pơdŭ pơgiăng container Hoà Phát Dung Quất hlăk ngă giong.

Ơi Hòang Ngọc Phượng, Kơ-iăng khua kông ty pơčruh ngăn pơkra pơsơi Thép Hoà Phát Dung Quất brơi thâo, klâo blan tal I thun anai, rơnoh pơsơi man pơdong mơ̆ng sang bruă gơñu pơkra rai truh 692.000 tơn. Sang bruă gơñu hlăk pơđĭ tui rơnoh pơkra ming amăng 3 blan tal II tŏ tui, djru pơtrut rơnoh pơđĭ kyar tuh tia pơkra ming ƀơi tơring čar:

“Anom bruă gơmơi đing nao pơtum pơkra ming, sĭ mơdrô hmar ƀiă hăng kơtưn wai lăng rơnoh prăk tuh pơ alin; đing nao kơ bruă tuh pơ alin măi mok, gơnam yua, ba yua boh thâo ia rơgơi phrâo, pơblih yua mrô, kiăng pơđĭ tui anŏ tŭ yua gơnam pơkra ming, anăp nao pơkra hơbô̆ gơnam tam pơkra ming phrâo, gơnam yua hơdjă rơgoh, pơgang ayuh hyiăng, anih hơdip jum dar hăng ngă djơ̆ tơhnal pơkă mơ̆ng jar kmar. Kông ty ăt ngă tui beč bal mơ̆n amăng bruă pơkra ming, sĭ mơdrô hăng tač rơngiao, pơtrut bruă pơkra ming hăng čih pơsit anăn gơnam sĭ mơdrô ngă pô”.

Klâo blan tal I thun 2026, rơnoh pơđĭ kyar GRDP tơring čar Quảng Ngãi dưi ngă djop 8,24%. Amăng kual tuh tia pơkra ming ăt djă hnơ̆ng bong kơjăp, nao hlâo, djru hrŏm sa mơkrah rơnoh pơđĭ kyar hrŏm; gah anom bruă pơkra ming, pơjing rai gơnam phrâo djru rơnoh pơđĭ kyar dua mrô. Gah anom bruă sĭ mơdrô bơwih bơwăng lĕ hlăk rŭ glăi mơ̆n, rơnoh sĭ mơdrô raih daih hăng prăk pơhrui glăi rơbêh 15%; bruă tuai čuă ngui pơphun hiam klă; sĭ mơdrô djă hnơ̆ng dua mrô. Anai lĕ, tơhnal pơkă hiam klă, jing atur pioh kơ tơring čar ăt pơtrut pok pơhai hmar pơđĭ kyar pơ anăp anai.

Khă hnun, mrô rơnoh pơđĭ kyar bơwih ƀong huă aka ƀu bơkơnar ôh. Hơdôm anom bruă kah hăng mă kông ngăn amăng gŭ lŏn, bruă pơkra gơnam hăng klĭ juă; prăk pơhrui glăi hrŏ hĭ pơkă hăng tal anai thun hlâo. Lăp đing nao dơ̆ng, prăk yua tuh pơ alin kơ bruă čar kaih, kiah ngă djop 7% akŏ bruă jao, jing anŏ ngă gun prong biă mă kiăng khom ruh hĭ.

Gah bruă ngă hmua, pla kyâo, rông akan hơdang kơnong đĭ năng ai 3%, yua kơ rơnoh prăk tuh pơ alin pơmă mơ̆ng blan 3, laih anun lu mơta gơnam ngă hmua, gơnam yua mă bruă, pơdŭ pơgiăng lêng kơ đĭ soh, mơnuih ƀôn sang tuh pơ alin kơ bruă hmua hăng pơkra ming ăt hrŏ tui. Gah bruă ngă hmua pla kyâo bơbeč djơ̆ mơ̆ng hrơi ngă yang thun phrâo, pơdơi pơdă sui hrơi; bruă hyu mă akan hơdang tơnap tap yua nua ia săng ia jâo pơmă. Gah bruă tuh tia pơkra ming-man pơdong, đĭ tui 12,76%, lu kơ gơnam pơkra ming, mă mơñă ia jâo hăng pơkra pơsơi. Ơi Võ Thành Nhân, Khua anom bruă jŭ yap tơring čar Quảng Ngãi lăi lĕ:

“Man pơdong ră anai kơnong hơmâo 4,9% amăng rơnoh dăp bruă bơwih ƀong huă; Man pơdong hrŏ trun 8,8%, ngă kơ rơnoh pơhrui glăi GRDP đơ đam tơring čar hrŏ trun mơ̆n. Tui anun, mah lu hai, samơ̆ rơnoh hrŏ amăng bruă anai, ăt bơbeč djơ̆ kơtang truh kơ rơnoh pơđĭ kyar hrŏm”.

Tuh pơ alin kơ bruă čar ăt pơtong rơđah, sa bruă ngă phun kiăng pơtrut rơnoh pơđĭ kyar amăng thun 2026. Khă tui anun, rơnoh ba yua prăk  kơnuk kơna dŏ ƀiă đơi, truh rơnuč klâo blan tal I, kiah hơmâo 7,2% đôč pơkă hăng akŏ bruă jao. Tơring čar Quảng Ngãi hlăk ngă tui khut khăt hloh, git gai pơsir hĭ anŏ gun, kiăng pơtrut hmar bruă mă yua prăk tuh pơ alin mơ̆ng kơnuk kơna pioh kơ bruă čar.

Tui hăng ơi Nguyễn Công Hoàng, Kơ-iăng khua Jơnum min mơnuih ƀôn sang tơring čar Quảng Ngãi, bruă ba yua rơnoh prăk tuh pơ alin kơ bruă čar ƀơi tơring čar dŏ kaih lĕ, yua mơ̆ng lu tơlơi ba truh. Ƀơi gưl să, lu plơi pla aka prăp lui ôh kơ bruă pơphun či ngă tui, ruah mă kơčăo bruă pơhrua, kơnong hneč mă djop ring bruă hơmâo anăn amăng hơdrôm hră, anun yơh kaih mă yua prăk tuh pơ alin. Ƀơi gưl tơring čar, tơlơi dŏ gun le biă mă ăt bruă duh glăi lŏn sang đang hmua, pioh čuk pơdăo, pơklaih ala lŏn, pơtong glăi nua lŏn hăng bruă ngă dŏ hŭi, sư̆ rơbư̆.

Ơi Nguyễn Công Hoàng pơtrun hiăp djop gơnong bruă, sang bruă kơnuk kơna tơring čar, truh pơ să khom ngă tui khut khăt pơsir tañ anŏ gun, boh nik ñu amăng bruă lŏn tơnah hăng bruă git gai mă yua rơnoh prăk čan, kiăng pơtrut hmar hloh ngă tui djop kơčăo bruă:

“Hăng bruă mă git gai prăk kăk, pơtrun hiăp kơ Gơnong bruă prăk kăk tơring čar Quảng Ngãi hơmâo prăp lui hlâo, hmar hloh kah pơpha rơnoh prăk, tŭ mă prăk tuh pơ alin. Ƀuh rơđah tơlơi dŏ gun, hơmâo laih ring bruă lu samơ̆ kơƀah prăk tuh pơ alin, lơ̆m anun hơmâo laih prăk samơ̆ aka ƀu thâo, ƀu dưi mă yua aka ƀu găl. Bruă git gai ba yua prăk kiăng jŭ yap glăi abih bang, biă mă ñu lơ̆m prăk pơhrui glăi yua lŏn, duh jia aka djơ̆ tơhnal pơkă. Laih dơ̆ng, kiăng sem lăng tong ten hloh, bruă mă yua rơnoh prăk pơhrui glăi, bĕ hĭ tơlơi dŏ tơguan nao pơ anŏ aka ƀu sit ôh, dŏ lu tơlơi truh či hơmâo, rơngiă hĭ anŏ ngă bơkơnar kông ngăn prăk kăk kơnuk kơna.