Tlam lơ 22/9, Anom bruă git gai tơhan tơring čar Dak Lăk pơphun jơlan hơdră pơbưp, ră ruai mơ̆ng djŏp rơnuk khua mua, ling tơhan ƀrô ngă lơphet 80 thun Hrơi gru grua tơhan blah ngă tơring čar (23/9/1945-23/9/2025). Sui mơ̆ng anai 80 thun, lơ 23/9/1945, Ping gah Việt Minh Dak Lăk pơsit akŏ pơdong Anom bruă git gai tơhan tơring čar, tơhan blah ngă lĕ Tiểu đoàn Giải phóng quân N’Trang Lơng hăng akŏ pơdong khul tơhan mơ̆ng tởing čar truh pơ să. Găn rơgao 80 thun blah ngă hăng kjăp bruă, djŏp rơnuk khua mua, ling tơhan ƀu pơdơi pơyơr pran jua, gum pơgôp, djai pơsăn drơi, gum pơgang Lŏn ia, jing anih kơnang kjăp mơ̆ng Ping gah, Kơnuk kơna hăng Mơnuih ƀon sang.

Hăng tơlơi jơnum “Kjăp tơkai yŭ hla gru Tơhan khŏm blah dưi”, mông pơbưp anai pơƀuh tơlơi ră ruai, tơlơi hơdor glăi mơ̆ng djŏp rơnuk khua mua amăng thun blan blah ayăt, lăi nao bruă akŏ pơdong khul tơhan amăng rơnuk phrâo. rơnuk hlăk ai hrơi anai ăt pơdah pran jua gir run  tŏ tui, pơtrut tui gru hiam đưm mơ̆ng ơi yă, adơi ayong, kjăp pran jua, kjăp tơlơi pơmin ngă hơkrŭ. Ƀrô tal anai, Anom bruă git gai tơhan tơring čar ngă hrŏm hăng Hlăk ai tơring čar Dak Lăk pơtum glăi tơlơi pơplông hơduah ĕp 80 thun Hrơi gru grua tơhan blah ngă tơring čar, brơi 28 pri kơ khul grup, mơnuih hơmâo tơlơi pơplông rơgơi hloh./.