Tŏ tui hrơi mông pơbưp nao rai hăng ngă hrŏm kơplah wah Việt Nam - Kur tal V, tlam 7/11, ƀơi tơring čar Dak Nông pơphun jơlan hơdră pơbưp nao rai kơplah wah Khua mua Việt Nam - Kur, anai lĕ ƀing tơhan, ƀing rơgơi kơhnâo djru blah ngă hơđăp, ling tơhan wai pơgang guai hăng hlăk ai tơring čar Dak Nông. Nao jơnum hrŏm, gah dêh čar Kur hơmâo ơi Vann Phal, Khua djru bruă Khua dêh čar ơi Hun Sen, Kơ-iăng Khu khul giang mah Kur - Việt Nam ba jơlan hlâo hrŏm hăng khua mua djop gưl, gơnong bruă, gong gai ƀon lan dêh čar Kur.

Amăng mông bưp, pô pơ ala brơi ƀing hlăk ai, amai H’Hồng, Kơ-iăng Khua khul hlăk ai tơring čar Dak Nông pơpŭ bơni hơ-ơč hăng hơdôm tơlơi gum pơgôp, tuh rơyuh pran jua mơng rơnuk ơi yă yua kơ tơlơi rơngai hăng pơjing tơlơi rô nao rai giang mah kơplah wah Việt Nam - Kur. Hlăk ai Dak Nông lăi phara hăng hlăk ai dua boh dêh čar hnun mơn amra gum tơngan hrŏm pơtrut ngă tơlơi rô nao rai jai hrơi yôm phăn, hiam klă.