Găn rơgao 5 thun pơphun pơplông, tơlơi bang hyu mơ̆ng Tal pơplông anai jai hrơi prong hloh, lar hyu lu mơnuih ngă hrŏm mơ-it nao tơlơi pơhing čih ră ruai, pơtô pơblang, amăng hơdôm thun anun, tŭ mă tơlơi pơplông thun tơdơi lu hloh kơ thun hlâo. Pơplông tal sa hơmâo tŭ mă 8.129 tơlơi čih pơplông, truh thun anai đĭ truh 541.766 mơta tơlơi čih. Đĭ pơhiăp klah čun amăng mông jơnum, ơi Nguyễn Xuân Thắng,  Khua sang hră hrăm bruă kơđi čar dêh čar djă anăn Hồ Chí Minh, Khua git gai Tal pơplông čih tơlơi pơtô djơ̆ pơgang atur tơlơi pơmin mơ̆ng Ping gah lăi pơtong:

Lŏn ia hlăk yak nao amăng rơnuk hrưn đĭ pơđĭ kyar phrâo hăng kơnuih yak nao kơjăp hloh, gru grua juăt hơmâo tơlơi khăp kơ lŏn ia, tơlơi kiăng pơđĭ kyar kơtang, pran jua thâo gum pơgôp, tơlơi pơmin kơjăp ngă pô, h’ĭn pran jua, gir run mă pô, lăp pơ-ư ang kơ djuai ania, hơmâo râo pơdưh glăi laih anun pơđĭ kơtang hloh. Kiăng dưi ngă djơ̆ tơlơi pơtrun yak nao amăng rơnuk hrưn đĭ mă pô hăng kơnuih phrâo, Hră čih hlâo kơ Hră pơtrun pioh pơdah đĭ amăng mông jơnum ruah khua ping gah dêh čar tal XIV, jao kơ sang hră hrăm bruă kơđi čar dêh čar djă anăn Hồ Chí Minh pô git gai čih pơkra, ngă hrŏm Khul pơčrâo bruă 35 mơ̆ng ping gah dêh čar, Anom pơtô bruă ping gah hăng pơtrut mơnuih ƀôn sang dêh čar, Khul pơčrâo bruă 35 djop tơring čar pơblih phrâo laih hơdră mă bruă, pơphun pơplông čih tơlơi pơtô djơ̆ kơ bruă pơgang atur tơlơi pơmin mơ̆ng Ping gah.