Dak Lăk jing tơring čar bưp tơlơi truh, răm rai kơtang hloh amăng tal hơjan kơthel ia dăo phrâo rơgao, hăng mrô jŭ yap brơi ƀuh tơring čar hơmâo 55 čô mơnuih djai, 10 čô aka ƀu ĕp ƀuh, rơbêh 150.000 boh sang ia dăo dlăm, răm rai rơbêh kơ 5.500 klai. Ră anai ia trun tui laih ƀơi abih bang hơdôm boh să, phường gah ngŏ, anun jing tơlơi gêh găl kiăng ling tơhan, khul grup ječ ameč djru ba mơnuih ƀôn sang.

Khua ping gah tơring čar ơi Lương Nguyễn Minh Triết kiăng pơtô brơi hơdôm grup djru khăp pap pơpha gơnam djơ̆ anih, djơ̆ pô kiăng djru; gum nao kih rơmet anih anom, sang dŏ, jơlan nao rai, biă ñu sang hră, sang ia jrao đah mơ̆ng tañ pơphun glăi bruă bơwih brơi mơnuih ƀôn sang. Gơnong bruă ngă hmua hăng pơđĭ kyar ƀôn lan, Gơnong bruă Kông ngăn hăng Ayuh hyiăng, Kông an tơring čar hăng Anom bruă git gai tơhan tơring čar iâu pơthưr ling tơhan djru mơnuih ƀôn sang duñ pơƀut asuk, kor lŏn hlŭ, pơkra anih anom, gir tañ djru mơnuih ƀôn sang pơwơ̆t glăi tơlơi hơdip.

Khua jơnum min mơnuih ƀôn sang tơring čar Dak Lak, ơi Tạ Anh Tuấn, phrâo nao ĕp lăng amăng kual bơbeč yua kơtang ia ling dăo ngă hăng djru pơklaih brơi mơnuih ƀôn sang amăng kual ia ling dăo, yua khua anom bruă tơhan blah ngă tơring čar pok pơhai. Ră anai, hơdôm rơtuh čô khua mua, ling tơhan mơ̆ng Trung đoàn 584 hăng trung đoàn 888 hlăk dŏ djru kih rơmet lŏn hlŭ, pơdŭ dăp glăi kơƀang grê, sưng dŏ amăng sang hră, ming pơkra glăi sang hră, sang ia jrao, pok pơhai hơbô̆ bruă djru “sang apui ling tơhan hăng mơnuih ƀôn sang” kiăng tơnă asơi hơbai añăm brơi kơ mơnuih ƀôn sang kual ia ling dăo. Khua tơring čar, pơtrun hiăp kơ djop gơnong bruă tơring čar, khua mua djop să, plơi pla ăt krăp lăng tong ten djop mơnuih ƀôn sang, anăm lui hơmâo mơnuih ư̆ rơpa kơƀah mơnong ƀong huă ôh, djop sang bruă hơdai gum hrŏm ling tơhan nao pơsir hĭ anih dŏ jum dar kiăng rơgoh hơdjă, jŭ yap glăi rơnoh răm ƀăm rơngiă rơngiom, kiăng tañ pơhơđong glăi tơlơi hơdip mơda mơnuih ƀôn sang, suaih pral, bơwih ƀong huă hơđong pơ anăp adih tơdơi kơ abih kơthel.

Ƀơi Gia Lai hăng Khánh Hòa, bruă pơgang klin tơdơi kơ ia dăo glăk hơmâo ngă ječ ameč, či pơgang ba tơlơi suaih pral kơ mơnuih ƀôn sang. Gơnong bruă ia jrao rim boh tơring pơkiăo nao hơdôm pluh čô khua, mơnuih mă bruă trun nao pơ hơdôm boh să dăo dlăm či pruih kman mač, ngă hơdjă ia yua, pơtô brơi mơnuih ƀôn sang rơmet drơi jăn pô, dun pơƀut asuk, plai ƀiă hơmâo klin kman lar hyu.

Hlâo kơ anun, Ding jum ia jrao ba nao giăm 10 tơn ia jrao pơdjai kman amăng ia hăng hơdôm rơbâo kơdung ia jrao kiăng yua hloh djru kơ Khánh Hòa, Gia Lai, Dak Lăk pơgang pơhlom tơdơi kơ hơjan ia dăo. Anom bruă ia jrao pơtă kơ mơnuih ƀôn sang ƀu dưi mă yua ia aka ƀu pơkra hơdjă, kih rơmet sang anŏ, drông war, laih dong ngă hrŏm hăng hơdôm anom apăn bruă či krăp lăng, tañ ƀuh tơlơi phara.