Hơdôm bruă mă hiam mơ̆ng ƀing khua mua, tơhan pơlih jơlan glông hơmâo ngă pơđao pran jua mơnuih ƀôn sang đĭ rơdêh mơ̆ng taih glăi pơ plơi pla čơkă thun phrâo, kiăng djru kơ bruă rô nao rai rơnuk rơnua djơ̆ tơlơi phiăn. Tui hăng rơnoh jŭ yap hrơi blung a ngă tui lơ 2/2/2024, tơhan pơlih jơlan glông hơmâo ƀơk rơbêh 4.000 gêt ia mơñum, 4.000 akhăn rơ-ơ̆, 1.200 kg hơbơi čên hơtŭk giong, 1.500 boh kơtor mơda laih hơtŭk, 2.500 tơlô̆ ƀañ tơpung hăng pơblih brơi 250 boh đuăn pơgang akŏ kjăp, rơnoh prăk djru 50 klăk prăk, jak iâu mơnuih mơnam djru.

Hơdră bruă ‘gum hrŏm mơnuih ƀôn sang rô nao rai ƀơi jơlan glông bơyan têt” anai sa bruă mă hiam, tŭ yua biă mă pơdah rai pran jua tơlơi khăp pap tui tơlơi pơtô “Yua kơ mơnuih ƀôn sang khom ngă bruă” mơ̆ng tơhan kông an mơnuih ƀôn sang Việt Nam, djru kah pơpha tơlơi tơnap tap hăng mơnuih dŏ ataih mơ̆ng plơi pla, glăi pơdơi ƀong têt hăng sang anŏ, laih dơ̆ng kiăng djru ba pơtă pơtăn đĭ rơdêh thut djơ̆ tơlơi phiăn rơnuk rơnua ƀơi jơlan amur sa arăt jơlan phun djă anăn Hồ Chí Minh găn nao pơ kual Dap Kơdư.