Djă ƀơi tơngan hră pơčrang lăng drah, hơtai boh, siêu âm tơdơi kơ khăm tơlơi suaih pral yua ƀing ơi ia jrao sang ia jrao Nội tiết gơnong glông pok pơhai ƀơi kual 4 tơhan sơlup, amai Phạm Thị Thoa, bơnai sa čô mơnuih apăn bruă glăk mă bruă ƀơi kual 4 tơhan sơlup ƀuh hơđong amăng pran jua biă mă. Sui mơng anai 5 blan, yua hơmâo khăm mơng ƀing ơi ia jrao hrŏm hăng sang ia jrao ling tơhan mơng Grup pơjrao 486, kual 4 tơhan sơlup mơ̆ ñu ƀuh ruă bơbrah asar ƀơi rơkông đok, tơdơi anun hơmâo breh pơjrao, ră anai amai Thoa ăt plai ƀiă yơh. Amai Thoa brơi thâo:

“Tui hơđăp khŏm nao khăm pơ ataih, ră anai ƀing ơi ia jrao glăi khăm pơjrao tơl anih rơngiă ƀiă mông đôč, mơ̆ hlâo anun rơngiă ha wŏt hrơi tơjuh. Bruă ƀing ơi ia jrao rai khăm pơ anai yôm phăn biă mă, djru brơi lu mơnuih ƀon sang Khánh Hoà ƀơi anai”.

Amăng hơdôm hrơi pơphun khăm pơjrao, trung tá Nguyễn Hữu Nhất, Khua sang ia jrai ling tơhan Sư đoàn 377, anom bruă tơhan rơdêh por ăt hrŏm hăng tơhan tui nao mơng mơguah ƀơi grup pơjrao 486.

“Hlâo kơ khăm pơčrang lăng ƀơi anai, anom bruă hơmâo mă drah pơčrang lăng hlâo, hơdôm mrô pơkă lăng ƀuh lu mơnuih ruă ngă tơnap pơplih ia rô nao rai bơdjơ̆ nao sik, đạm, ia mơmuă. Mơng khăm ƀơi anai ƀing ơi ia jrao hơmâo abih pran jua, črâo brơi tong ten, ƀing apăn bruă ƀơi anom bruă ăt hơđong pran jua amăng bruă mă ƀing gơñu”.

Amăng hơdôm thun anai, rĭm thun, khua mua sang ia jrao Nội tiết gơnong glông ăt hrŏm hăng grup hyu mă bruă hơmâo hơdôm pluh čô ơi ia jrao mơng hơdôm anih anom pơjrao tơlơi ruă kă mơng sang ia jrao nao čuă jơmư, khăm pơjrao brơi ƀing apăn bruă, ling tơhan hơdôm anom bruă ƀơi pioh kơđong tơhan Cam Ranh hăng mơnuih ƀon sang amăng phường Cam Nghĩa hăng tơring glông Cam Lâm, tơring čar Khánh Hòa. Sit biă ñu, amăng thun 2020, sang ia jrao hơmâo djru man pơdong anom bruă khăm pơjrao djop tơlơi ruă, Sang ia jrao Lữ đoàn 101, kual 4 tơhan sơlup să Cam Thành Bắc, tơring glông Cam Lâm. Truh ră anai, anom bruă khăm pơjrao Sang ia jrao Lữ đoàn 101 jing anih arăng đăo gơnang mơng ƀing apăn bruă hăng mơnuih ƀon sang ƀơi anai rĭm wŏt hơmâo tơlơi duam ruă. Ơi Cao Quốc Khánh, dŏ ƀơi să Cam Bình, plơi prong Cam Ranh brơi thâo:

“Ơi ia jrao ƀơi anai ăt abih pran jua, bơwih brơi ƀing mơnuih duam ruă, črâo brơi rĭm anom bruă, rĭm bruă, rĭm blan kâi ăt nao pơkă lăng ară drah. Lơm thâo Lữ đoàn 101 hơmâo sang ia jrao, ƀơi anai lĕ anih blung a kâo nao khăm pơjrao tơdah hơmâo tơlơi ruă kă. Lơm rai pơ anai kâo hơđong amăng pran jua biă mă”.

Mơng hơbô̆ bruă blung a aka ƀu pơhlôm, hăng mrô mơnuih duam ruă rĭm thun kơnong 3 rơbâo čô, tơdơi kơ hơmâo tơlơi djru amăng bruă mă, gơnam măi mok mơng Sang ia jrao Nội tiết gơnong glông, rĭm thun, Sang ia jrao Lữ đoàn 101 hơmâo nao khăm, pơjrao brơi 18 rơbâo čô mơnuih duam ruă. Hrŏm hăng anun, hơdôm boh sang ia jrao gơnong glông hơmâo pơkiăo nao ƀing ơi ia jrao, nai ia jrao nao mă bruă pơ sang ia jrao, hăng pran jua gum hrŏm hăng djru nao rai hăng ƀing tơhan sơlup Việt Nam glăk pơdong ƀơi hơdôm kual bul pơtâo plao ia rơsĭ ataih mơng rŏng lŏn hơmâo bơwih brơi klă gah bruă ia jrao, mơng anun, pơlir hơbit bă blai pran mut hrŏm kơplah wah ling tơhan hăng mơnuih ƀon sang Việt Nam./.