Ƀơi mông pơtô hrăm hlâo, khua mua, mơnuih kơhnăk amăng bruă git gai wai lăng hăng ƀing nai pơtô hrăm hră gưl dua mơ̆ng 5 boh tơring čar amăng kual Dap Kơdư, hrăm kơ tơlơi pơhing phrâo lăi nao tơlơi truh lŏn adai ngă amăng dêh čar hăng ƀơi rŏng lŏn tơnah, hơdră pơphun hăng pok pơhai bruă mă, pơhlôm pơgang mă pô kơ čơđai sang hră laih anun hơdră pơgang ayuh hyiăng ƀơi anăp kơ tơlơi pơblih ayuh hyiăng lŏn tơnah, ba pơtô hrăm amăng sang hră, ngă tui amăng bruă mă sit nik đah mơ̆ng pơhrŏ ƀiă tơlơi răm ƀăm truh.

Ơi Nguyễn Huỳnh Quang, Kơ-iăng khua anom bruă wai lăng tơlơi truh mơnuih ƀôn sang, gah anom bruă wai lăng bơnư̆ pơkong ia hăng pơhlôm tơlơi truh, Ding jum Ngă hmua hăng pơđĭ kyar plơi pla lăi lĕ, hơdôm anih pơtô anai, djru kơ abih bang mơnuih thâo pơhlôm pơgang mă pô ƀơi anăp kơ tơlơi truh či hơmâo tui Kơčăo bruă anăn “Pơđĭ tơlơi thâo hluh kơ mơnuih ƀôn sang hăng wai lăng tơlơi răm ƀăm truh lŏn adai ngă kơnang kơ ană plơi pla gum hrŏm truh thun 2030” yua Khua dêh čar pơsit laih.