Rơđah biă ñu, rim blan, djop sang bruă gah kông ty apui lơtrik Dak Lak hơmâo tơlơi čih pôr pơhing, pơdah rup video pơdjơ̆ nao kơ bruă wai lăng hơđong, rơnuk rơnua apui lơtrik čih amăng website anom bruă apui lơtrik ăt kah hăng hră pơhing phrâo, pơtui jua pơhiăp pôr truh pơ să, phường mơ̆ng 2-4 wơ̆t sa blan.

Kơnang kơ tơlơi pơhing plang Zalo hăng Facebook, Anom bruă apui lơtrik Dak Lak ăt ngă tui hơdră pơtô pơblang ba yua apui lơtrik hơđong hăng thâo pơkrem truh pơ hơdôm hơpluh rơbâo čô mơnuih hơmâo anăn yua apui lơtrik. Hăng hơdră pơtô brơi yua rơnuk rơnua čih in hră anet 62.000 pok djă hyu, pơpha kơ djop sang bruă, mơnuih mơnam, čih pơtô ber amuñ thâo hluh hăng ngă tui.

Mơ̆ng blan 10/2023, ngă hrŏm grup hyu sem lăng lu sang bruă kiăng pơhlôm, pơgang tơlơi truh apui ƀong sang, Anom bruă apui lơtrik Dak Lak hơmâo ngă hrŏm pơtô pơblang kơ djop sang bruă, sang anŏ, mơnuih ƀôn sang kiăng pơhrŏ ƀiă tơlơi či truh, anŏ pơtuh apui lơtrik lơ̆m ngă hmua ƀudah pơkra ming gơnam hăng sĭ mơdrô.