Amăng 5 thun rơgao, Jơlan hơdră hơmâo pok pơhai abih bang hlom bom djŏp tơring čar, ƀon prong; hơmâo pơphun rơbêh 300 rơbâo anih pơtŏp hrăm, pôr pơthâo kơ hơdjă mơnŏng ƀong huă; iâu pơthưr rơbêh 8,5 klăk boh sang anŏ hăng sang mơdrô anet kĭ hră pơkra gơnam, sĭ mơdrô gơnam mơ̆ng hmua akan hơdang, kyâo rơnuk rơnua. Jơlan hơdră anai ăt djru akŏ pơjing hơdôm pluh rơbâo hơbô̆ bruă ngă hmua tui hơnong pơkă VietGAP, hơdjă, ngă hmua mơtah, pơdar nao rai; giăm 9 rơbâo mơta gơnam OCOP; hơdôm rơbâo anom ngă ƀong hrŏm, ƀut ngă hrŏm hơmâo pơtô brơi, akŏ pơdong phrâo ƀudah ngă ming kjăp, djru pơđĭ tui anŏ yom nua gơnam, dưi pơhno ƀơi anih mơdrô amăng čar ta wơ̆t hăng ba sĭ pơ čar rơngiao.

Klah čun glăi mông jơnum, Kơ-iăng khua dêh čar ơi Lê Thành Long lăi, pơ anăp kiăng pơplih kơtang mơ̆ng pôr pơthâo jing pơtô ngă hlao; plih bruă mă mơ̆ng mơnuih ngă hmua, pơkra gơnam, biă ñu lĕ sang anŏ mơdrô anet; pơtrut akŏ pơjing anih pơkra gơnam mơtah, pơjing anih anom hiam, hơdjă, pơdar nao rai, pơlir mă yua boh thâo mrô hăng pơčeh phrâo. djŏp gưl anom bruă pơhlom hơmâo djŏp tơlơi găl, hrŏm hăng ană plơi pla anăp nao pơđut hlao bruă pơkra gơnam sĭ mơdrô gơnam ƀong huă ƀu hơdjă, hơƀak jrak, pơgang ba tơlơi suaih pral kơ mơnuih tơpuôl hăng đĭ kyar ngă hmua hơđong kjăp.