Đĭ pơhiăp pơđut mông jơnum, Khua git gai pơ ala mơnuih ƀôn sang dêh čar ơi Vương Đình Huệ brơi thâo, jơnum hơmâo laih 7 tơlơi lăi pơthâo mơng ƀing rơgơi kơhnâo amăng mông jơnum abih bang hăng 2 mông jơnum tui bruă phara, rơbêh 40 tơlơi čih mơng hơdôm khul grup, ƀing rơgơi kơhnâo. Amăng hơdôm mông jơnum tui bruă phara hăng jơnum abih bang kah hăng jơnum bơkơtuai khua mua pơprong hơmâo laih rơbêh 40 tơlơi pơgôp hiăp mơng ƀing rơgơi kơhnâo, hơdôm anom bơwih ƀong sĭ mơdrô hăng khua mua amăng lŏn ia hăng tač rơngiao mut hrŏm pơlăi nao rai, pơčrông sai hrŏm.

Jơnum hơmâo pơlăi nao rai mơng hơdôm anom bơwih ƀong sĭ mơdrô hluai tui ƀing pơ ala mơng Khul pơlir sĭ mơdrô hăng tuh tia pơkra pơjing Việt Nam (VCCI), mơng hơdôm khul, mơng sa, dua boh anom bơwih ƀong sĭ mơdrô nao jơnum hrŏm; pơlăi nao rai kơplah wah ƀing rơgơi kơhnâo amăng lŏn ai hăng tač rơngiao, ƀing kơsem min boh thâo ia rơgơi, hơdră bruă hăng anom pơphun ngă tui hơdră bruă kah hăng ƀing tŭ mă. Jơnum jing hrơi mông pơlăi nao rai djop bơnah hăng djop mơta. Ƀing khua mua hơmâo lăi nao hơdôm tơlơi pơtrut mơng tơlơi dưi sit nik amăng pơđĭ kyar mơtah hăng pơsit tong anai lĕ jơlan gah phun amăng bruă pơjing hơdră bruă, akŏ bruă anăp nao bơkơtưn hăng pơđĭ kyar bơwih ƀong huă hơđong kjăp.