Mơguah lơ 8/10, ƀơi Sang bruă ping gah dêh čar, tơdơi kơ rơbêh 2 hrơi mă bruă hăng pran jua ngă bruă tơpă, hmar, djơ̆ hơdră, ngă khua pô, gơgrong ba prong, Jơnum lok 13 khua mua apăn bruă ping gah dêh čar tal XIII hơmâo pơđut laih.

Pơhiăp ƀơi mông jơnum pơđut, ơi Tô Lâm Khua git gai ping gah dêh čar lăi rơđah, Jơnum lok 13 khul apăn bruă ping gah dêh čar tal XIII ngă giong djop boh yom phun bruă ba tơbiă, jơlan hơdră mă bruă.

Ƀơi mông jơnum rim črăn bruă prăp lui tong ten, pơčrong sai tơpă, pơsit hrŏm abih bang tŭ ư soh, amăng anun lu boh yom phun pơdjơ̆ nao kơ bruă pơsit tŭ yua jơnum prong ruah khua ping gah dêh čar tal XIV, truh kơ lu tơhnal pơkă pơđĭ kyar hmar, hơđong, truh pơ bruă mă pơđĭ tơlơi hơdip mơda kơ mơnuih ƀôn sang amăng dêh čar. Jơnum lok anai, hơmâo pơčrong sai tơpă, djơ̆ rơ-ua hăng bơtŭ ư hrŏm prong djop jơlan hơdră, tơlơi pơtrun yom kơ dêh čar. Amăng anun, Khul apăn bruă ping gah dêh čar hơmâo pơsit hĭ Hră lăi pơthâo, či pơtrun amăng mông jơnum ruah khua ping gah tal XIV; tŭ ư lăi pơthâo mơnuih apăn bruă ngă khua pơ anăp adih, boh yom phun, jơlan hơdră, tơlơi pơkă kơ bruă mă, tơlơi phiăn ruah khua amăng mông Jơnum ruah khua ping gah dêh čar tal XIV hăng anăp ngă khom ngă djơ̆ tơlơi phiăn, tơlơi pơtrun, pơblih phrâo, djơ̆ rơ-ua, tŭ yua hloh, sit nik.