VOV4.Jarai-Tơdơi kơ 7 hrơi mă bruă hmar, tơpă khŏp hăng pran jua gơgrong ba sit nik, tom brơi, lơ 9/10, ƀơi sang bruă ping gah dêh čar, Jơnum lok năm khua mua apăn bruă ping gah dêh čar tal XIII jơnum pơđut yơh, yua kơ ơi Nguyễn Phú Trọng Khua git gai ping gah dêh čar ta pô git gai jơnum. Pơhiăp amăng mông pơđut jơnum, Khua git gai ping gah lăi pơtong, sa tơlơi phrâo hloh amăng tal jơnum anai lĕ: tal blung a khua mua apăn bruă ping gah dêh čar sem glăi, pơsit pioh kơ ƀing khua mua yua kơ gơnong dlông wai lăng lui ƀu ngă pô apăn bruă ping gah dêh čar tal XIII tui hăng jơlan hơdră mơ̆ng Ding jum kơđi čar tui hăng Hră pơtrun kơ bruă lui ngă khua, brơi pơdơi ngă khua hăng mơnuih apăn bruă laih anun Hră lăi pơthâo pơdưm bruă kơ khua mua tơdơi jăm tơlơi soh, hăng ơi Nguyễn Thành Phong ding kơna apăn bruă ping gah dêh čar, ơi Huỳnh Tấn Việt, Bùi Nhật Quang, hăng ngă hră pơtrun jăm ƀuah tơlơi soh ơi Phạm Xuân Thăng, ding kơna ping gah dêh čar, Khua git gai ping gah, Khua jơnum min pơ ala mơnuih ƀôn sang tơring čar Hải Dương, brơi tơbiă ping gah hlao.

Khua git gai ping gah ơi Nguyễn Phú Trọng đĭ pơhiăp pơđut jơnum lok năm tal XIII

Khua git gai ping gah dêh čar pơdah pran jua đăo kơnang sit nik amăng abih bang ping gah, ling tơhan hăng mơnuih ƀôn sang amra ngă tui tŭ yua hơdôm pok hră pơtrun, hră klah čun mơ̆ng Gơnong dlông tal anai, djru hrom ngă tui truh kih Hră pơtrun jơnum ping gah dêh čar tal XIII, ngă brơi kơ lŏn ia ta jai hrơi pơdrong asah, Djuai ania ta jai hrơi jai hing ang hloh.

Nay Jek: Pơblang