Tô̆ tui jơlan hơdră jơnum tal 29, lơ 9/1, Jơnum min apăn bruă Khua pơ ala  mơnuih ƀôn sang hmâo gum pơhiăp kơ bruă tŭ mă, lăi pơblang, pơplih pơkra 2 hră čih pơkra Tơlơi phiăn yôm phăn tơdơi kơ anun pơđut mông jơnum. Anun lĕ tơlơi čih pơkra Tơlơi phiăn lŏn drŏn (pơplih pơkra) hăng Hră čih Tơlơi phiăn hơdôm khul brơi čan prăk (pơplih pơkra). Hră čih Tơlơi phiăn lŏn drŏn (pơplih pơkra) tơdơi kơ tŭ mă, pơplih pơkra hmâo 16 črăn hăng 260 mơta tơlơi. Bơhmu hăng hră čih Tơlơi phiăn lăi pơthâo kơ Jơnum min apăn bruă Khua pơ ala mơnuih ƀôn sang amăng mông jơnum kơplah wah dua tal Jơnum lok 6,  hră čih Tơlơi phiăn hmâo lui laih 5 mơta tơlơi, ngă giong, pơplih pơkra 250 mơta tơlơi.

Pơđut mông jơnum tal 29, Khua git gai wai lăng pơ ala mơnuih ƀôn sang dêh čar Vương Đình Huệ rơkâo hơdôm Jơnum min mơ̆ng Khua pơ ala mơnuih ƀôn sang, hơdôm ƀirô bơdjơ̆ nao pioh dong mông tŭ mă, pơplih pơkra Tơlơi phiăn Lŏn drŏn (pơplih pơkra) ; hră čih Tơlơi phiăn hơdôm khul brơi čan prăk (pơplih pơkra); hră čih Tơlơi pơtrun pơsit kơ sa dua hơdră pơkă, hơdră bruă pha ra pioh pơtlaih tơlơi tơnap, tơlơi gun, pơtrut tañ rơnoh ngă tui hơdôm Jơlan hơdră pơkă mơ̆ng lŏn ia hăng hơdôm bôh yôm phăn pơkon pioh prăp lui kơ Tal jơnum lok 5, Khua pơ ala mơnuih ƀôn sang tal 5, pok phun amăng lơ 15/1./.