Đĭ pơhiăp, Khua git gai Ping gah ơi Tô Lâm lăi pơtum glăi hơdôm boh than hăng hơdôm boh tơhnal bruă mă kiăng ngă mơ̆ng anai truh hrơi Jơnum lok 15 hăng Jơnum ruah khua ping gah dêh čar tal 14. Laih dong lăi, Khul khua apăn bruă phun git gai Ping gah bơkơtuai lăp djơ̆, bơkơnar, thâo pơhmư̆, tong ten, hơmâo lu mơnuih tŭ ư ruah khua amăng Ding jum kơđi čar, Khul khua git gai ping gah dêh čar tal 14.

Khul khua apăn bruă phun git gai Ping gah jao kơ Ding jum Kơđi čar hăng Grup prăp rơmet ruah khua Jơnum  ruah khua ping gah dêh čar tal 14 sem lăng pơhrua tui dong, čih pơkra giong djŏp bruă ruah khua mua djơ̆ hăng jơlan gah ruah khua mơ̆ng Khul khua apăn bruă phun git gai Ping gah dêh čar tal 14 hăng akŏ tlôn bruă ruah khua hơmâo ba tơbiă či lăi pơthâo kơ Khua mua apăn bruă phun git gai Ping gah sem lăng pơsit ƀơi mông Jơnum lok 15 pơ anăp. Pơ anăp anai, Khua git gai Ping gah kiăng pơƀut lăng ba, djru ngă kjăp hơbô̆ bruă gong gai dua gưl mă bruă tŭ yua hloh.