Ngă tui anô̆ gal mơng pô, tơring čar Quảng Nam đing nao lăi pơthâo hơdôm anih anom tuai čuă ngui mơtah nao hrom pơgang hăng ngă tui anô̆ yôm bôh thâo djuai ania ƀiă ƀơi kual čư̆ siăng, guai lŏn ia, djru pơtrut gơnong bruă tuai čuă ngui pơđĭ kyar, pơđĭ tui tơlơi hơdip mơda mơnuih ƀôn sang.

Mơng krah blan 3 phrâo rơgao, lom Việt Nam tô glăi hơdôm jơlan por jar kơmar hăng pok pơhư abih bang hơdôm bruă tuai čuă ngui, tơring čar Quảng Nam hmâo čơkă laih hơdôm rơbâo wot čô tuai mơng dêh čar tač rơngiao. Tơdơi rơbêh kơ 2 thun bơbeč mơng klin Covid-19, yă Debbie Baker tuai mơng dêh čar Mi mơng hmao tal pơwŏt glăi Việt Nam. Ñu ruah laih tơring glông kual čư̆ siăng guai dêh čar ƀơi Đông Giang, tơring ccar Quảng Nam lĕ anih pơdơi tơkai. Yă Debbie Baker lăi pơthâo, hơdôm anih anom klă mơtah, tuai găn rơgao hor biă amăng hơdôm hrơi anai.

“Kâo ƀuh djơ̆ pran biă lom rai pơ̆ Việt Nam, kâo khăp kơ Việt Nam hăng ană mơnuih ƀơi anai. Hơdôm hrơi ƀơi anai lĕ hơdôm hrơi tâ̆o klă biă hăng kâo, biă ñu lom dưi găn rơgao lăng mông jơnum ngui bôh thâo pha ra, ngă pơhư̆č pran jua, dlai tlô klă hiam. Neh wa ƀơi anai thâo amen, thâo kiăng kơ tuai. Kâo hor biă gơnam ƀong mơng neh wa ƀơi anai”.

Hlâo kơ tal klin Covid-19 gluh đĭ, rim thun hơdôm bôh tơring glông kual čư̆ siăng gah tơring čar Quảng Nam kah hăng Phước Sơn, Tây Giang, Đông Giang… čơkă hơdôm rơtuh rơbâo wot čô tuai. Lu anih anom nao tuai amăng lŏn ia ta hăng dêh čar tač rơngiao thâo truh kah hăng Đỉnh Quế, phun kyâu djă pioh Pơ Mu, Plơi tuai čuă ngui plơi pla Bhơ Hôồng…

Lu wot nao pơ̆ tơring glông Tây Giang, amai Lương Thị Hương, Khua Anom rơwang bruă khul Children Of Việt Nam hmâo lăi pơthâo lu tuai mơng dêh čar tač rơngiao rai pơ̆ anai găn rơgao lăng hơdôm tơlơi jơnum ngui pha ra mơng djuai ania Kơtu. Tui hăng amai Lương Thị Hương, rơngiao kơ ayuh hyiăng rơ-ơ̆, ană mơnuih ƀuh jê̆ giăm lĕ dlai tlô lu mơta, dưi pơgang kah hăng dô̆ hơnong hơđăp ƀơi Tây Giang lĕ tơlơi klă biă pioh pơlar bruă tuai čuă lăng dlai tlô.

 “Tơlơi kâo ƀuh lăng djă pioh lĕ arăng dưi djă pioh dlai kyâu Pơ Mu, gơñu čih pioh mrô akô̆ tlôn rim phun hăng jao kơ mơnuih ƀôn sang wai lăng mă pô. Rơngiao kơ anun, kâo ăt ƀuh djă pioh mơn hăng tơlơi jơnum ngui mơng mơnuih ƀôn sang ƀơi anai, tơlơi suang Tâng tung da dá ngă pơhư̆č tuai biă, kâo hmâo gum hrom lu wot laih hăng ƀing gơmơi hmâo mơ-ak hrom laih hăng gơñu amăng tơlơi yun suang anun”.

 Lu thun rơgao, tơring glông Tây Giang hmâo čơkă mă hơdôm grŭp tuai jar kơmar gum hrom hơdôm tour tuai čuă lăng plơi pla, găn rơgao lăng tơlơi hơdip mơda, bôh thâo mơng neh wa Kơtu. Ayong Pơloong Plênh, mơnuih mă bruă mơng Anom bôh thâo hăng pôr pơhing tơring glông Tây Giang lĕ, pô tô nao rai, ba tơbiă tơlơi pơmin pha ra kơ tuai găn rơgao lăng. Amăng hơdôm tal gum hrom hăng tuai čuă lăng dlai tlô phun Pơ Mu, pô tơdăm Kơtu anai ngă laih tuai mơng dêh čar tač rơngiao heng hong lom yua bôh pơhiăp tơlơi Anglê pioh lăi pơthâo kơ bôh thâo mơng neh wa pô.

“Kâo kiăng hơdôm anô̆ yôm bôh thâo đưm klă hiam amra dưi lăi pơthâo truh djop kual mơng lŏn ia hăng truh pơ̆ gơyut gơyâu djop rŏng lŏn. Tal blung ba jơlan lĕ bưp lu tơlơi gun biă, ƀu djơ̆ hrom bôh pơhiăp, laih anun gơnam ƀong huă mơng gơñu pha ra hăng pô samơ̆ gơñu hor biă mut hyu tơl đang war, dưi djă čong pioh čoh lŏn, pla añăm laih anun truh mơmot čuh apui suang bơkơtuai nao rai hăng neh wa”.

Hlâo kơ tal klin Covid-19 gluh đĭ, tơring čar Quảng Nam pơtrun pok prong anih anom tuai čuă lăng, hyu hơduah ĕp lăng ƀơi kual čư̆ siăng gah Yŭ hăng dlai tlô hmâo lu mơta hrom hăng bôh thâo neh wa djuai ania ƀiă pha ra. Ơi Arất Blúi, Kơ-iăng Khua Jơnum min mơnuih ƀôn sang tơring glông Tây Giang, tơring čar Quảng Nam brơi thâo, tuai hyu čuă lăng kual čư̆ siăng gah Yŭ tơring čar Quảng Nam kiăng tuh pơplai djơ̆ rơnoh pioh ngă tui tơhnal gal hmâo mơng ñu.

 “Ƀing gơmơi čang rơmang Kơnuk kơna hăng tơring čar Quảng Nam đing nao tuh pơplai hloh dong kơ anom mă yua, djru bruă nao rai hluh gah, hmâo hơdôm akô̆ bruă, hơdră bruă pơđĭ kyar bôh thâo, bơkơjăp drơi jăn, tuai čuă ngui. Khom lăng ba truh anô̆ yôm bôh thâo gơnam tam hăng tơlơi adôh suang kiăng djă pioh, pơgang ba hăng pơhư prong”.

Amăng jơlan gah pơsit pơđĭ kyar tơring čar Quảng Nam, 5 thun pơ̆  anăp tơring čar biă ñu đing nao pơđĭ kyar bruă tuai čuă ngui kual čư̆ siăng gah Yŭ. Ơi Lê Trí Thanh, Khua Jơnum min mơnuih ƀôn sang tơring čar Quảng Nam brơi thâo, pơđĭ kyar bruă tuai čuă ngui čư̆ siăng Quảng Nam ƀu klah đuăi bruă pơgang hăng pơlar dlai tlô hăng pơgang bôh thâo đưm ƀơi anai. Tơdah pơgang hăng pơlar djơ̆ jơlan gah, anai jing hơdôm anô̆ yôm phun pơjing ƀô̆ mơta phrâo kơ tuai čuă ngui Quảng Nam pơ̆ anăp anai.

“Pơđĭ kyar dong bruă tuai čuă ngui ƀơi hơdôm anih anom amra mă yua gah tuai čuă lăng dlai tlô, tuai hyu lông lăng hăng pơdơi pơdă. Tuai čuă lăng dlai tlô nao hrom hăng bôh thâo đưm hơđăp ƀơi anai mơng neh wa djuai ania ƀiă ƀơi kual čư̆ siăng. Abih bang hơdôm djuai tuai čuă ngui prong hăng anet amra lê̆ nao hrom kiăng pơjing rai anô̆ ngă pơhư̆č phrâo kơ tuai čuă ngui kual Yŭ mơng tơring čar Quảng Nam”./.