Kual glai ƀơi plơi Nhọt dŏng ƀơi kơtuai Jơlan mrô 37, hmâo lŏn prong giăm truh 200 ektar, dưi pơjing mơ̆ng 2 ruăi čư̆ pơgang, kuh thun ayuh hyiăng rơ-ơ̆. Thun 1954, amăng tal mơ̆ng Nghĩa Lộ (tơring čar Yên Bái) nao pơ̆ Điện Biên gum hrŏm bruă blah ƀơi Điện Biên Phủ, Đai tướng Võ Nguyên Giáp hăng Grŭp tơhan tlaih rơngai hmâo pơdơi tơkai, pơdŏng puih kơđông ƀơi anai, anun yơh mơ̆ng anun, kual glai dưi hmâo mơnuih ƀôn sang iâo hăng anăn kiăng khăp lĕ "Glai Đại tướng Võ Nguyên Giáp".

Ƀu djơ̆ hăng hơdôm kual glai pơkon kah hăng abih bang kơnong kơ dô̆ kyâo tătăn, hrĕ pal, glai Đại tướng Võ Nguyên Giáp ăt dô̆ hơnong mơn hơdôm phun kyâo chò kơnong kơ dô̆ kyâo hrăi prong hơdôm čô mơnuih kuar ƀu abih mơn, hrŏm hăng anun lĕ hơdôm phun lát, dổi, pơmu tơpă brăng, dlông wơwet.

7 pluh thun rơgao, glai anai ăt dô̆ iam mơn, mơtah hlê̆, kah hăng pơdah pran jua kiăng khăo mơ̆ng neh wa djop djuai ania ƀơi anai pioh kơ Đại tướng Võ Nguyên Giáp hrŏm hăng grŭp tơhan thun anun. Ơi Lò Văn Linh, Khua grŭp wai lăng pơgang glai plơi Nhọt, să Gia Phù lăi pơthâo:

 “Kâo ư-ang dưi gum hrŏm Grŭp wai lăng pơgang glai Đại tướng Võ Nguyên Giáp. Ƀing gơmơi juăt lăi pơhing hyu kơ neh wa, pioh rơnuk tơdơi amra tô̆ tui wai lăng hăng djă pioh glai klô na nao. Gah pô ƀing gơmơi, rim rơwang hrơi tơjuh hyu glai 3 tal pioh pơgang apui ƀong glai hăng pơgang hlôm hlâo mơnuih ƀôn sang plơi giăm guai mut mă djuh, mơ̆ng anun pơgang glai klă hloh”.

Ơi Đinh Công Són ƀơi să Gia Phù tơdơi giăm hmâo 30 thun gum hrŏm Grŭp pơgang “Glai klô Đại tướng Võ Nguyên Giáp” ră anai dưi hơdai nao gơgrong bruă wai lăng Pra yang Đại tướng đam ƀơi gru grua djă pioh anai. Ñu brơi thâo, khă thun tha rơma laih, samơ̆ ñu amra abih pran jua pô hrŏm hăng neh wa bơwih brơi, wai lăng Pra yang hăng Kual djă pioh gru grua pioh pơhlôm mơtah na nao, gaih, hiam, jing pran jua mơ̆ ñu hăng neh wa ƀơi anai djă hơdor pioh na nao kơ Đại tướng Võ Nguyên Giáp:

 “Kâo ư-ang biă hăng lăi pơthâo kơ rơnuk hlăk ai, biă ñu ƀing čơđai sang hră hơdôm bôh sang hră, mơnuih amăng khul hlăk ai lơm nao pơ̆ Pra yang găn rơgao lăng. Kâo ăt lăi pơthâo mơn kơ ƀing čơđai hăng lăi pơhing kơ gru grua ư-ang mơ̆ ơi yă pioh glăi. Dưi pơgang pra yang rim hrơi, pơplih ia, tuĭ ñang kơ ƀing wa lĕ tơlơi ư-ang mơ̆ng drơi pô, kâo ƀuh mơ-ak biă”.

Djă pioh gru pơđom gru grua đưm nao hrŏm hăng anăn păn mơ̆ng Đại tướng, thun 2008, Jơnum min mơnuih ƀôn sang tơring čar Sơn La hmâo tŭ yap kual glai klô Đại tướng Võ Nguyên Giáp lĕ gru grua gưl tơring čar. Truh thun 2020, tơring čar Sơn La jao kơ tơring glông Phù Yên pok pơhai, ngă tui rơwang bruă pơhrua nao, pơkra glăi hăng ngă tui nua yôm Gru grua blah ayăt Prang kual glai plơi Nhọt kơjăp phik, nao hrŏm hăng pơđĭ kyar tuai čuă ngui mơ̆ng Sơn La lăi hrŏm, tơring glông Phù Yên lăi ha jăn, pơjing anih nao amăng tal pơwot glăi anih blah ngă đưm, ngă tui pran jua “Ƀong bôh hơdor tơngia mơ̆ng djuai ania”. Rơnuč thun 2021, tơring glông Phù Yên hmâo mă yua ring bruă pơgang glai klô, pơkra glăi, pơkra ming hăng ngă tui nua yôm Gru grua đưm kơdŏng blah ayăt Prang kual glai plơi Nhọt hmâo hơdôm mơtă bruă man pơkra ming: Sang hơdor pioh Đại tướng Võ Nguyên Giáp; lan pra yang, lan ngă lơphet, tơdrôn toa pơkra kiăng hiam, bah amăng war tam quan...

Nao pơ̆ anai, mơnuih ƀôn sang, tuai čuă ngui ƀu kơnong kơ dưi hơdip glăi amăng tơlơi hur har mơ̆ng Khul tơhan tlaih rơngai anăp nao Điện Biên gum hrŏm bruă blah ayăt ƀơi Điện Biên Phủ thun anun mơ̆, dô̆ dưi tlaih bơngat jua pô amăng anih kah hăng mơyang, ayuh hyiăng klă hiam mơ̆ng Kual Djă pioh gru grua Pra yang Đại tướng Võ Nguyên Giáp. Amai Nguyễn Thị Hồng Hạnh ƀơi tơring glông Phù Yên (Sơn La) lăi pơthâo:

 “Hăng sa čô amăng rơnuk hlăk ai tơkeng rai amăng rơnuk – rơnuk rơnua, drơi pô kâo ƀuh ư-ang biă hăng ư-ang, kâo ƀuh ta khom jing sa čô mơnuih lăi pơhing klă hloh dong, pioh dưi lar hyu hơdôm nua yôm gru grua mơ̆ng anih tuai čuă ngui nao hăng tuai čuă ngui amăng tơring glông pô hăng tơring glông pơkon”.

Gru grua đưm blah ayăt Prang kual glai plơi Nhọt hăng Pra yang Đại tướng Võ Nguyên Giáp jing hơdôm gru grua đưm bôh thâo hmâo nua yôm gah pran jua yôm phăn, pơtă rơnuk ră anai kơ hơdôm pran tuh rơyuh, pơsăn drơi mơ̆ng ơi yă ta yua kơ tơlơi rơngai, dưi pô kơ lŏn ia. Hơdôm bruă ngă hur har mơ̆ng Đại tướng Võ Nguyên Giáp hrŏm hăng khul ling tơhan Điện Biên Phủ tal anun amra dô̆ pơđom pioh na nao, kah hăng glai klô mơtah djă anăn Đại tướng hmâo hăng glăk dưi hmâo djă pioh, pơgang hăng pran jua pơpŭ yôm phăn hloh mơ̆ng mơnuih ƀôn sang ƀơi anai./.