Hlâo kơ nao jơnum ƀu tui tơđar lok Sa, khua mua pơ ala mơnuih ƀôn sang dêh čar tal XVI, grup khua mua pơ ala mơnuih ƀôn sang dêh čar mơ̆ng tơring čar Dak Lak hơmâo pơphun jơnum pơgôp hiăp hơdôm mơta tơlơi phiăn piho pơdah đĭ amăng mông jơnum khua mua pơ ala mơnuih ƀôn sang dêh čar sem glăi.

Sa amăng hơdôm boh yom phun lăp đing nao lĕ tơlơi phiăn čih pơhrua glăi hơdôm mơta tơlơi amăng Tơlơi phiăn pơhlom, pơgăn yua prăk soh sat juăt lăi rao prăk. Ƀuh sit tơlơi soh sat ba yua boh thâo ia rơgơi phrâo rơnuk anai hăng anăn gru mrô pơmut prăk jai hrơi ngă bruă lŭk pŭk tơnap tap biă mă plư pleč arăng, anun yơh lu tơlơi pơgôp hiăp rơkâo brơi pơhrua nao dơ̆ng tơlơi pơkă phrâo, kah pơpha nao rai tơlơi pơhing, djru ba mrô rơnoh tui hrơi mông hmao kru plah wah hơdôm ding jum, anom bruă pioh bơwih brơi tơlơi kiăng thâo ƀing yua prăk tơpă, pơtong rơđah bruă pơmut hăng suăi mă prăk, hŭi hơmâo tơlơi đing nao ƀu djơ̆ pô prăk, khom tui kru hơduah ĕp prăk anun pơmut nao pơ pô hlơi đah mơ̆ng hmao pơgăn hĭ tơlơi soh sat. Ơi Võ Quang Duy, khua pơ ala tơhan ĕp tơlơi soh gah anom bruă kông an tơring čar Dak Lak rơkâo đĭ:

“Ră anai, tơlơi soh rao prăk hăng anăn mrô laih anun tơlơi plư pleč leč pơdar, mă yua boh thâo ia rơgơi mrô, gơñu pơđuăi hyu prăk hmar biă mă. Tơdah djop ding jum, anom bruă kơnong ngă hrŏm tui hơdră mơ-it hră rơkâo gum hrŏm hrup hlâo adih, sit mơ̆n prăk ƀing soh sat pơđuăi hyu truh pơ lu pô mrô anăn djă prăk laih, pơtruh brơi kơ pô ngă gong jơlan, amra tơnap kơ bruă sem kơđi tơlơi soh, ĕp pô ñu, kiăng pơgăn bruă ngă soh sat anun. Yua kơ anun, kiăng biă mă pơtruh nao rai plah wah mrô pơtruh nao rai kiăng ƀing ta tañ ĕp ƀuh pô prăk ngă soh hăng pơgăn hĭ prăk pơđuăi hyu brơi nao pơ pô pơkŏn”.

Ta dưi lăi, anai lĕ anih pơphun ngă, ƀuh rơđah biă mă amăng bruă pơkơdong glăi hăng pơgăn tơlơi soh sat rao prăk, kiăng lăi mă yua prăk soh sat ƀu tơpă, đah mơ̆ng tañ ngă giong tơlơi phiăn pơkă brơi djop sang bruă hơmâo tơlơi dưi lu hloh pioh pơgang anŏ hơđong prăk kăk hăng anŏ tŭ yua kơ mơnuih ƀôn sang. Hăng tơlơi phiăn pơhrua nao hơdôm tơlơi amăng Tơlơi phiăn gơgrong ba duh glăi mơ̆ng Kơnuk kơna, lu khua mua rơkâo brơi ĕp glăi ten anŏ pơkă kơ hrơi blan pơsir, kiăng duh glăi kơ hơdôm bơnah ngă hrŏm, kiăng tŭ ư hrơi blan pơkă sem lăng anŏ răm ƀăm hăng tơlơi bơtŭ ư nao rai dua bơnah duh glăi, kiăng pơhlom brơi bruă tơgŭ kơđi mơ̆ng mơnuih pô rơkâo duh glăi. Yă Phan Thị Hoa, Kơ-iăng khua Gơnong bruă Tơlơi phiăn tơring čar Dak Lak lăi:

“Rơkâo anom bruă čih pơkra kơsem min tong ten hrơi mông abih hrơi pơkă tui tơlơi rơkâo duh glăi tơdah hơdôm bơnah hơmâo tơlơi bơtŭ ư hrŏm ngă sui hrơi blan pơkă kơ anŏ răm ƀăm, pơčrong sai nao rai; ƀudah kơsem min pơhrua nao tơlơi phiăn pơkă duh glăi ngă tui tơlơi dưi tơgŭ kơđi, ăt kah hăng pơgang brơi anŏ tơpă djơ̆ hnơ̆ng lơ̆m ngă tui djop tơlơi pơtrun amăng tơlơi phiăn”.

Hơdôm tơlơi pơgôp hiăp anai lêng kơ anăp nao tơhnal pơkă klă hloh pơgang tơlơi dưi hăng boh tŭ yua djơ̆ găl tơlơi phiăn mơ̆ng monuih ƀôn sang, laih dơ̆ng djru kơ tơlơi pơkă bruă pơtrun amăng tơlơi phiăn anun rơđah rơđong hloh, tŭ ư sa hnơ̆ng hăng gêh găl brơi bruă ngă tui.

Tơlơi mơ̆ lăp čih pioh lĕ rim kơ tơlơi pơgôp hiăp lêng kơ hơmâo mơ̆ng bruă mă sit nik soh, lăi pơthâo tơlơi tơnap tap, anŏ ngă gun lơ̆m ngă tui amăng tơlơi phiăn pơtrun. Anai lĕ, kơnôl brơi ƀuh rơđah bruă čih pơkra tơlơi phiăn đing nao tong ten kơ tơlơi glăm ba mơ̆ng djop gưl anom bruă hăng mơnuih ruah khua.

Hơdôm tơlơi pơgôp hiăp tơpă djơ̆ hnơ̆ng hơmâo čih pioh mơ̆ng bruă hơmâo sit nik rim hrơi amăng bruă mă, grup khua mua pơ ala mơnuih ƀôn sang dêh ƀơi čar tơring čar Dak Lak hơmâo kơsem min, čih pioh,  ba pơdah thâo amăng mông jơnum prong. Anun lĕ hơdră pioh kơ djop mơta tơlơi phiăn dưi čih pơkra lĕ sa tơlơi pơgôp abih boh thâo ia rơgơi amăng ping gah, djơ̆ pran jua ană plơi, ngă djơ̆ hăng bruă akŏ pơdong kơnuk kơna, yua tơlơi phiăn git gai mơnuih mơnam bơkơnar, ngă khua pô laih anun bơwih brơi kơ tơlơi dưi, boh tŭ yua kơ mơnuih ƀôn sang lăp djơ̆ hloh.