Ƀơi kual giăm guai tơring čar Dak Lak, anom bruă apui lơtrik tơring glông Ea Sup glăk wai lăng rơbêh 21.000 čô mơnuih mă yua apui lơtrik hăng prăk pơhrui rĭm blan giăm 12 klai prăk. Sit biă ñu, anom bruă ăt dăng hyu apui yua brơi 9 puih kơđông tơhan mơng Việt Nam hăng Kur. Hăng anih čư̆ siăng kriang pơtâo, mơnuih ƀôn sang dŏ hơdip raih daih, jơlan nao rai tơnap tap, anom bruă apui lơtrik Ea Sup hơmâo gơgrong hăng hơdeč hmar ngă tui lu hơdră bruă pơhlôm apui lơtrik yua rơnuk rơnua, hơđong.

Ƀing apăn bruă gah anom bruă apui lơtrik ăt đing nao pơphun jơnum pơƀut kiăng pơbưp nao rai hăng mơnuih ƀôn sang, pơlăi nao rai boh thâo amăng mă yua apui lơtrik rơnuk rơnua, lăi pơthâo hăng lăi glăi tơlơi tơña bơdjơ̆ nao apui lơtrik. Anom bruă ăt hơdeč hmar pơplih hơdôm hơdră duh prăk yua apui lơtrik kiăng lăp djơ̆ hăng tơlơi gal sit nik mơng mơnuih kual giăm guai, ƀơƀrư̆ djru brơi neh met wa dưi tŭ mă hơdôm tơlơi djru mơng gơnong bruă apui lơtrik.