Ding jum Pơtô hăng Pơjuăt lăi pơtong, ăt amra djop mơ̆n hơdrôm hră kơ thun hrăm phrâo anai 2023-2024. Hrŏm hăng anun, bruă ngă tui Hră pơtrun pơblih phrâo hơdră pơtô hrăm, hơdrôm hră pơtô hrăm phun ăt dưi hơmâo Jơnum min apăn bruă phun pơ ala mơnuih ƀôn sang dêh čar gleng nao, laih anun rơkâo Ding jum Pơtô hăng Pơjuăt khom pơphun čih pơkra sa mơta hơdrôm hră djop hloh mơ̆ng anih 1 truh anih 12.

Kơ-iăng Khua Ding jum Pơtô hăng Pơjuăt ơi Hoàng Minh Sơn brơi thâo, thun blan rơgao hơmâo lu tơlơi bơngơ̆t hŭi kơƀah hơdrôm hră hrăm anih 4, anih 8 hăng anih 11. Phun ñu yua kơ djop tơring čar thun anai kaih ruah hơdrôm hră, ha bơnah dơ̆ng yua pơsit rơnoh blơi hră ăt kaih đơi mơ̆n. Khă tui anun, truh ră anai, djop tơring čar hơmâo pơsit djop laih. Khua mua Ding jum Pơtô hăng Pơjuăt lu wơ̆t laih mă bruă hăng khua mua sang bruă in pơkra hơdrôm hră Pơtô hrăm Việt Nam kiăng djru pơsir hĭ tơlơi tơnap tap gah anom bruă, brơi in pơkra hăng ngă giong bruă in pơkra hơdrôm hră hrăm hơdôm thun hlâo:

“Kơnong kơ hơdrôm hră anih 4, anih 8 hăng anih 11 lĕ hơdrôm hră phrâo, ră anai kiah pok pơhai bruă pơphun juă nua hăng in pkra truh 80% rơnoh jao. Dŏ glăi 20% tui hluai mơ̆ng djop tơring čar lăi pơthâo glăi djop kah, kiăng kơ sang bruă in pơkra hơdrôm hră pơtô hrăm Việt Nam dăp bruă  pơphun in pơkra. Laih anun ăt in pơkra djop hmao kru bơwih brơi kơ thun hrăm phrâo, djop hơdrôm hră hrăm kơ anih 4, anih 8 hăng anih 11. Tui anun amra ngă djop hơdrôm hră hrăm gưl phun”.

Hăng tơlơi čih pơkra hơdrôm hră hrăm, jơlan hơdră khom hơmâo mơnuih ƀôn sang djru hrŏm hăng kơnuk kơna, čih pơkra, čih hơdrôm hră hrăm, pơkă nua sĭ mơdrô hơdrôm hră hrăm jing jơlan hơdră prong dưi lăi pơthâo amăng Hră pơtrun mrô 88 thun 2014 mơ̆ng Anom bruă khua pơ ala mơnuih ƀôn sang dêh čar. Khua mua pơ ala mơnuih ƀôn sang dêh čar tal 14 ăt hơmâo mơ̆n Hră pơtrun mrô 122 anun lĕ lơ̆m ngă tui bruă čih dăp, in pơkra ngă tui hơdră kơnuk kơna hăng mơnuih mơnam gum hrŏm tơdah hơmâo sa tơlơi hrăm pơpă ngă giong boh ƀiă ñu khom hơmâo tơlơi pơtong glăi, pơsit hĭ pok pơhai bruă dăp hơdră čih pơkra hơdrôm hră hrăm, mă yua păk kơnuk kơna djru kơ tơlơi hrăm anun. Ră anai abih bang tơlơi hrăm lêng kơ hơmâo hơdrôm hră soh. Kơ-iăng Khua ding jum ơi Hoàng Minh Sơn  lăi dơ̆ng:

“Tal anai djop anih hơmâo pơsit laih truh 9/12 lêng kơ hơmâo 3 per hơdrôm hră hrăm. Ding jum Pơtô hăng Pơjuăt amra ngă tui Hră pơtrun mơ̆ng Sang bruă khua pơ ala mơnuih ƀôn sang dêh čar-Hră pơtrun mrô 122. Pơ anăp anai, ăt khom pơtong glăi boh yôm phun čih pơkra 3 mơta hơdrôm hră dơ̆ng, 3 mơta hơdrôm hră hrăm kơ 3 gưl, anih 5, anih 9 hăng anih 12 jing anih hrăm rơnuč gưl hrăm”.

Jơnum lok 25 mơ̆ng Jơnum min apăn bruă phun pơ ala mơnuih ƀôn sang dêh čar hlăk jơnum pơ Hà Nội pơphun bruă ĕp lăng akŏ bruă “Ngă tui Hră pơtrun mrô 88 mơ̆ng Khua pơ ala mơnuih ƀôn sang dêh čar tal 13 hăng Hră pơtrun mrô 51 khua pơ ala mơnuih ƀôn sang dêh čar tal 14 kơ bruă pơblih phrâo hơdră pơtô hrăm, čih pơkra hơdrôm hră pơtô hrăm gưl phun phrâo. Jơnum min apăn bruă phun pơ ala mơnuih ƀôn sang dêh čar rơkâo Ding jum Pơtô hăng Pơjuăt khom čih pơkra laih anun in hơdrôm hră hrăm brơi djop mơ̆ng anih 1 truh anih 12 hơmâo 137 mơta djuai hơdrôm hră hrăm.

Laih pel ĕp lăng brơi ƀuh, hơdră pơtô hrăm gưl phun (phổ thông) thun 2018 dưi čih pơkra lu mơta biă mă, kơsem min tơpă ară khut khăt, hơmâo pơblih hĭ mơ̆ng bruă pơtô ba tơlơi thâo truh kơ anăp pơđĭ kyar, hrăm ngă pơhiam amăng pran jua, tơlơi thâo kơ čơđai sang hră; pơtong rơđah 5 mơta anŏ hiam pran jua hăng 10 mơta tơlơi thâo mơ̆ng drơi jăn phun, aliăng kiăng pơđĭ kyar tơlơi pơmin thâo rơgơi kơ čơđai sang hră hrăm gưl phun. Boh yôm phun pơtô amăng hơdrôm hră hrăm kiăo tui tơlơi kiăng thâo, khom dưi ngă tui hơdră pơtô hrăm gưl phun phrâo. Bruă čih pơkra hơdrôm hră hrăm hơmâo jak iâu pơtum lu mơnuih rơgơi kơhnâo, mơnuih hrăm lu, thâo tum, ƀing nai pơtô rơgơi, lăp đăo kơnang, tom găn rơgao lu laih pơtô pơhrăm gum ngă hrŏm.

Bruă pơblih phrâo hơdră pơtô hrăm, hơdrôm hră hrăm lĕ sa bruă mă yôm pơphăn biă mă kơ lŏn ia, kiăng hơmâo lu tơlơi đing nao hrŏm, prong mơ̆ng mơnuih ƀôn sang ruah khua hăng abih bang mơnuih ƀôn sang. Tui hăng ƀing khua pơ ala, hơdră pơtô hrăm gưl phun djă ba hiăp pơtrun, hră pơtrun lĕ djơ̆ yơh, samơ̆ hơdră kơnong pơkă kơ anŏ pơhlôm, jing kar hăng không kơ anŏ pơkă hnong tơlơi thâo. Bơ anŏ tŭ yua ñu kiăng thâo amăng gưl hrăm phun ăt yôm hloh mơ̆n, khom hơmâo tơlơi git gai wai lăng tong ten mơ̆ng Kơnuk kơna. Yua kơ anun, kiăng tơña hơduah tong ten bruă čih pơkra glăi djơ̆ hơdră pơtô hrăm lăp, nao djơ̆ jơlan, djơ̆ anăp či ngă bruă. Ơi Đỗ Văn Chiến, Khua Jơnum min djop djuai ania mơnuih mơnam dêh čar rơkâo:

“Bruă kiăng ngă mơta lĕ khom hơmâo, anun jing tơlơi pơtrun mă bruă sem lăng tong ten mơ̆ng khul čih pơkra, in hơdrôm hră, pơjing hơdrôm hră hăng ƀing ta khom pơtrun nua sĭ hơdrôm hră gêh găl hăng rơnoh prăk pơhrui mơ̆ng mơnuih ƀôn sang ră anai. Mơnuih ƀôn sang dŏ rơkâo hơdrôm hră hrăm anai khom hơmâo Kơnuk kơna pơkă nua. Pơblih pơkra ƀing ta khom anăp nao dĭ da adih. Yua kơ tơdah brơi anŏ hơgĕt kơ mơnuih tơnap tap lĕ kâo pơmin brơi boh hră amra hơđong kjăp hloh. Tơlơi rơkâo mơ̆ng Grup krăo lăng kiăng hơmâo anŏ găl, hơmâo kơnôl ngă tui hă, ƀu, khom pơmin dơlăm hăng lăi pơthâo lăp djơ̆”.

Khua git gai pơ ala mơnuih ƀôn sang dêh čar rơkâo khom ngă hră pơtrun pơtô brơi anăp či ngă, pơtong rơnoh hơdrôm hră hrăm, pơtong rơnoh đut tơhnal kơ hơdrôm hră hrăm, kiăng ngă djơ̆ krăo lăng tong ten rơnoh prăk pơkra ming, pơkrem prăk ngă gong jơlan, pơhrŏ hĭ rơnoh prăk ngă huač đôč đač kiăng pơtrun nua hơdrôm hră hrăm. Khua git gai pơ ala mơnuih ƀôn sang dêh čar rơkâo ngă tui khut khăt boh yôm phun amăng Hră pơtrun mrô 88 mơ̆ng khua pơ ala mơnuih ƀôn sang dêh čar kơ bruă pơblih hơdră čih pơkra hơdrôm hră hrăm phun:

“Hră pơtrun mrô 88 lăi rơđah: Ding jum Pơtô hăng Pơjuăt khom pơphun čih pơkra sa per hơdrôm hră pơtô hrăm djop mơ̆ng anih 1 truh anih 12 hơmâo 137 mơta hơdrôm hră. Djop sang bruă, anom bruă, mơnuih ngă hrŏm pơkŏn dưi pơsur ngă hrŏm čih pơkra hơdrôm hră pơtô hrăm sa mơta ƀudah hơdôm mơta tơlơi amăng hơdrôm hră, tui hluai tơlơi thâo mơ̆ng gơñu, ƀu tơguan čih tum teč, djop mơta amăng sa pok hơdrôm hră ôh.Tui hăng Hră pơtrun mrô 88 lĕ tui anun. Hră pơtrun mrô 122 lĕ pơsir brơi anŏ kiăng hlăk anun hơdôm djuai hơdrôm hră pơar hơmâo anih anom sĭ mơdrô pơsit laih, prăk kơnuk kơna aka ƀu djop ôh sit mơ̆n aka ƀu in pơkra djuai hơdrôm hră anun. Hră pơtrun mrô 122 ƀu hơngah ôh kŏn brơi pơhrua lơi Hră pơtrun mrô 88 hlâo  kơ anun. Yua kơ anun tơlơi hơmâo ră anai amăng khul grup ĕp lăng, krăo lăng pơčrâo brơi kâo ƀuh ăt lăp đing nao biă mă, ƀing ta khom kơsem min thim dơ̆ng”.