Ƀing ding kơna Jơnum min apăn bruă Khua pơ ala mơnuih ƀôn sang dêh čar lêng kơ pơdah tơlơi kiăng amăng čih pơkra hơdôm črăn tơlơi phiăn pơgang, pơgăn sĭ dŏp mơnuih (čih pơkra glăi); tơlơi phiăn mă jia gơnam sĭ mơdrô (čih pơkra glăi); tơlơi phiăn ia jrao (čih pơkra glăi); tơlơi phiăn wai lăng, mă yua phao kơtuang, boh pơtuh hăng hơdôm gơnam bơdjơ̆ nao (čih pơkra glăi). Hră pơ-ar hơmâo prap lui djop, djơ̆ tơlơi pơkă. Khua git gai pơ ala mơnuih ƀôn sang dêh čar ơi Vương Đình Huệ brơi thâo: hơdôm boh tơhnal amăng tơlơi phiăn kiăng lăp djơ̆ hăng tơlơi phiăn pơtrun hră pơ-ar djơ̆ tơlơi phiăn.

Hơdôm tơlơi pơtrun kơ jơlan hơdră čih pơkra tơlơi phiăn, tơlơi pơtrun kiăng pơkă tong ten lơm kơsem min, čih pơkra tơlơi phiăn. Hăng boh tơhnal phrâo hơmâo hơdră phrâo ƀudah hơmâo pơplih, pơhrua hơdră, kiăng lăng glăi tong ten tơlơi bơdjơ̆ nao. Khua git gai pơ ala mơnuih ƀôn sang dêh čar ăt pơtăn djop ding jum gơnong bruă, amăng anun hơmâo Ding jum phiah phiăn pơphô bruă brơi Kơnuk kơna kiăng plai ƀiă hơdôm črăn tơlơi phiăn mơ-it Jơnum min apăn bruă Khua pơ ala mơnuih ƀôn sang dêh čar sem lăng, pơsit pơhrua amăng jơlan hơdră.