Bah amăng jang jar kmar Lệ Thanh dong amăng jơlan mrô 19, tơkuh nao pơ tơdrun kompăn Quy Nhơn (235 km) hăng hơdôm boh tơring čar kual Dap kơdư, gêh gal biă mă brơi kơ bruă pơdŭ pơgiăng gơnam tam. Kual bơwih ƀong ha guai hăng tơring čar Ratanakiri (Kur). Bah amăng jang dong amăng kual tlâo bơnah pơđĭ kyar Việt Nam-Lao-Kur, hơmâo tơlơi gal prong kiăng jing anih ba gơnam sĭ mơdrô pơ tač rơngiao.

Yap truh abih blan 8/2025, abih tih rơnoh sĭ mơdrô pơ tač rơngiao hăng blơi mut găn nao bah amăng jang jar kmar Lệ Thanh, dưm dưm 155 klăk đôlar Mi. Amăng anun, sĭ mơdrô pơ tač rơngiao 63 klăk đôlar Mi hăng hơdôm gơnam phun anun lĕ pơdơi, kmơk, rơmô;ba sĭ mơdrô gơnam lu hloh, anun lĕ pơtơi đĭ 59% pơhmu tui tơđar. Rơdêh hăng mơnuih găn nao rai ăt đĭ kơtang. Samơ̆, tui hơdôm anom bơwih ƀong, bruă ba gơnam sĭ mơdrô găn nao bah amăng jang ăt hơmâo hơdôm tơlơi tơnap tap hơmâo: ngă hră pơ-ar găn nao rai, duh glăi jia ăt tơnap; prăk duh ƀu sit nik hăng jai đĭ kơtang ngă glêh tơnap, sit biă ñu hăng gơnam đang hmua. Kơ anih anom, hơmâo 5 boh sang lêng pơdong gah rơngiao kual bah amăng jang, ngă tơnap brơi logistics; bơyan sĭ lu gơnam ngă kơniă. Hrơi mông mă bruă ƀu djơ̆ hrŏm kơplah wah amăng jang Lệ Thanh (8 mông mơmŏt) hăng Oyadav (5 mông 30 mơnit tlam) ăt ngă gun amăng bruă pơdŭ pơgiăng gơnam.

Ơi Bùi Trần Nhân Trí-Kơ-iăng khua THILOGI (kông ti TNHH pơdŭ pơgiăng gơnam jar kmar Trường Hải) brơi thâo:

“Hơmâo sa tơlơi mah anet đôč amăng ngă hră pơ-ar, samơ̆ ăt ba truh kơ bruă mă mơng anom bơwih ƀong kaih hĭ. Anun lĕ ngă hră pơ-ar pơgang hơdjă gơnam boh troh. Tui tơlơi pơkă, hră pơsit gơnam hơdjă hăng boh troh hơmâo dêh čar Kur ngă brơi ƀơi Phnôm Pênh. Amăng dêh čar ta kiăng hơmâo hră phun. Samơ̆ mơng Phnôm Pênh glăi pơ amăng jang jar kmar Lệ Thanh rơngiă 2-3 hrơi, lơm anun rĭm hrơi kiăng kơ hơmâo hră pơ-ar. Rơkâo anom bruă wai pơgang boh troh tŭ ư hăng hră scan đuăi nao rai amăng plang điện tử hlâo, ngă gêh gal brơi hloh kơ anom bơwih ƀong sĭ mơdrô. Yua ƀing gơmơi sĭ mơdrô pơtơi, tơdah dŏ tơguăn 2 -3 hrơi amra kaih hĭ.”

Ơi Phạm Anh Tuấn-Kơ-iăng khua git gai Ping gah, Khu Jơnum min mơnuih ƀôn sang tơring čar Gia Lai rơkâo: djop gơnong bruă, sang bruă ječ ameč pel ĕp, pơsir hĭ mơtăm hơdôm tơlơi rơkâo ječ mơng anom bơwih ƀong sĭ mơdrô; laih dong pơtrut kơtang bruă pơplih ngă hră pơ-ar, pơplih pran ngă bruă tui jơlan gah gum hrŏm, djru brơi. Sui pơ anăp, tơring čar amra pơkra ming bah amăng jang jar kmar Lệ Thanh hăng pơgiong akŏ bruă pơđĭ kyar kual bơwih ƀong ƀơi amăng jang; laih dong mă bruă hăng tơring čar Ratanakiri (Kur) amăng blan 10/2025 kiăng pơsir hĭ tơlơi gun.

Khua Jơnum min mơnuih ƀôn sang tơring čar Gia Lai ăt iâu pơthưr anom bơwih ƀong sĭ mơdrô gơgrong amăng kơsem min anih sĭ mơdrô, pok prong anăp nao jơlan phrâo, sit biă ñu lĕ pơkra klă hloh gơnam đang hmua mơng hơdôm kual pla pơjing amăng lŏn ia hăng dêh čar Kur kiăng kơ ba sĭ pơ gah rơngiao. Ơi Phạm Anh Tuấn ƀuăn gong gai tơring čar amra gum hrŏm, pơhlôm brơi djop tơlơi gal, anăp nao hơnong pơkă ba rơnoh sĭ mơdrô pơ tač rơngiao hăng blơi mut mơng amăng jang Lệ Thanh mơng 2-3 klai đôlar Mi amăng thun 2030:

“Gah anom bơwih ƀong sĭ mơdrô, kâo rơkâo gum hrŏm mơtăm, čih anăn ngă. Hlơi kiăng ngă logistics, hlơi kiăng pơkra gơnam đang hmua, rơkâo kiăng hơdôm ektar lŏn, ngă hơget, kual pla gơnam pơ hơpă ? Lơm ngă kiăng pơƀut glăi kual pla gơnam ƀơi anai hăng hơdôm tơring čar ƀơi dêh čar Kur, tum pơƀut glăi, pơkra klă hloh, tơdơi anun pơgiăng tui jơlan dêh čar mrô 1, nao pơ tơdrun ia dơlăm Phù Mỹ, tơdrun kompăn Quy Nhơn. Rơkâo djop mơta tơlơi kiăng, kơ jia, prăk tuh pơ alin. Anom bơwih ƀong sĭ mơdrô amra gum hrŏm hăng tơring čar amăng bruă dưm dăp, man pơdong glăi kual bơwih ƀong ƀơi bah amăng jar kmar Lệ Thanh amăng rơwang phrâo pơ anăp.”

Jơnum Ping gah tơring čar Gia Lai tal I, rơwang thun 2025-2030 amra pơphun dong mơng lơ 2/10 truh lơ 4/10, Ping gah hăng mơnuih ƀôn sang Gia Lai hăng tơlơi gir run ba tơring čar Gia Lai jing tơring čar pơđĭ kyar kơtang ƀiă. Rơwang thun 2025-2030 hơmâo pơsit lĕ rơwang pơtrut kơtang hloh hăng hơnong pơkă pơđĭ kyar bơwih ƀong huă rơbêh 10% ha thun.

Ơi Hồ Quốc Dũng, Ding kơna Ping gah dêh čar, Khua git gai Ping gah tơring čar Gia Lai brơi thâo, kiăng dưi ngă tui hơnong pơkă amăng rơwang ngă bruă thun 2025-2030 ba tơring čar Gia Lai jing tơring čar pơđĭ kyar kơtang ƀiă, tơring čar pơsit “5 tơlơi akŏ phun pơđĭ kyar, 4 tơhnal pơtrut kơtang”, amăng anun pơđĭ kyar bơwih gah logistics tơdrun kompăn pơlir hăng jơlan glông hăng jơlan rơdêh đuăi hmar Quy Nhơn-Pleiku, bah amăng jang jar kmar Lệ Thanh, tơdrun kompăn jar kmar Quy Nhơn.

“Blung hlâo pơđĭ kyar tuh tia pơkra ming, sit biă ñu lĕ pơkra pơjing gơnam tam hluai tui tơlơi dưi, tơlơi gal amăng tơring čar. Dua dong lĕ pơđĭ kyar bơwih brơi tuai čuă ngui, tŭ mă hơdôm anŏ gal amăng kual čư̆ siăng, kual ia rơsĭ, tơlơi dưi mơng gru grua, kual lŏn ia hăng glai rưng kiăng ba tơring čar Gia Lai jing sa amăng hơdôm anih pơhưč tuai čuă ngui amăng kual hăng đơ đam dêh čar. Tlâo dong lĕ pơđĭ kyar logistics ƀơi tơdrun kompăn pơlir hăng jơlan glông, jơlan rơdêh đuăi hmar Quy Nhơn-Pleiku, bah amăng jang jar kmar Lệ Thanh, tơdrun kompăn jar kmar Quy Nhơn, pơjing glông Logistics tui jơlan ter Ngŏ Yŭ kiăng pơjing sa amăng hơdôm atur pơđĭ kyar amăng tơring čar.”