Tui nai prin tha Lương Bạch Vân, Khua khul črâo ba bruă pơtom hiăp hăng mơnuih dŏ hơdip pơ tač rơngiao-Jơnum min djop djuai ania mơnuih mơnam Việt Nam ƀôn prong Hồ Chí Minh, djop tơlơi črâo trun phrâo, pơprong lêng djă ba wŏt tơlơi gêh gal hăng tơlơi lông, hăng yôm hloh lĕ kiăng ba glăi tơlơi gal kiăng pơsur ƀing apăn bruă hơmâo pran hur har, thâo pơčeh phrâo, thâo pơmĭn khin ngă.

Ñu brơi thâo, bruă dưm dăp, ngă hơbot anih anom ră anai glăk dŏ glăi amăng bruă dưm dăp-hrŏ ƀiă anih anom, mơnuih apăn bruă, lơm anun tơlơi akŏ phun lĕ pơplih tơlơi pơmĭn, bruă mă, kiăng rĭm čô mơnuih apăn bruă dưi gơgrong pơjing tơlơi kiăng jing bruă mă sit nik.

“Ră anai glăk bưp tơnap tap, ƀing apăn bruă kiăng ngă bruă lu dua wŏt, lơm anun bruă nao rai, jơlan glông…bưp lu tơnap tap, kiăng gir run găn rơgao. Djop tơlơi čang rơmang lêng gơnang nao ƀing apăn bruă phrâo, rơkâo mơnuih apăn bruă kiăng hluh rơđah, thâo mă bruă. Ƀing ta čang rơmang tui anun samơ̆ kiăng pơjing tơlơi kiăng anun jing bruă mă sit nik, anun kiăng rĭm čô mơnuih hrưn đĭ, gir run lu ƀiă dong. Kiăng găn rơgao hơdôm tơlơi tui anun kah hăng hrưn đĭ kơtang. Kâo đăo gơnang amra dưi ngă”.

Mơnuih phat kơđi Trương Thị Hòa, Kơ-iăng khua anom bruă wai lăng sĭ mơdrô ƀôn prong Hồ Chí Minh brơi thâo kiăng ƀing apăn bruă thâo pơmĭn khin ngă, anun tơlơi glăm ba mơng ƀing apăn bruă lĕ akŏ phun.

“Tơlơi črâo trun ră anai mah hơmâo lu tơlơi pơgôp hiăp phara, lu mơnuih hŭi ngă tui samơ̆ kâo pơmĭn, ƀing mơnuih thâo hăng hluh rơđah ăt khĭn ngă mơn. Tơdah ngă klă ăt huăi hơget ôh. Ăt tong ten samơ̆ yôm hloh lĕ tơlơi phiăn kiăng tong ten. Yua anun hơdôm tơlơi pơtrun mơng Ping gah kiăng hmao tlôn, dưi čih pơkra jing tơlơi phiăn. Ping gah ăt hơmâo tơlơi črâo trun pơplih phrâo, tañ hloh…djop tơlơi lêng kơtang mơ̆ tơlơi phiăn ăt aka ƀu dưi kiăo tui hmao tlôn, tơlơi anai ngă bơdjơ̆ sat nao ƀing apăn bruă”.

Wai pơgang ba mơnuih khin ngă bruă ƀu djơ̆ kơnong pơgang brơi anŏ soh, anai lĕ wai pơgang brơi tơlơi thâo pơčeh yua kơ tơlơi dưi hrŏm. Ha bơnah dong lĕ, yă Phạm Thị Quyên, kơ-iăng khua khul pơlir mơnuih mă bruă tơring čar Tây Ninh lăi pơtong lĕ, hăng ƀing apăn bruă amăng khul mut phung, pran thâo pơmĭn, khĭn ngă, pran glăm ba kiăng pơlir hăng bruă wai pơgang tơlơi dưi djơ̆ tơlơi phiăn, lăp djơ̆ sit nik mơng mơnuih mă bruă.

“Hơdôm hơdră bruă anun kiăng čih amăng tơlơi phiăn. Ră anai, ƀing ta hơmâo laih tơlơi phiăn mơnuih mă bruă mut phung, amăng anun pơkă tong ten kơ hơdôm tơlơi dưi, tơlơi glăm ba mơng ƀing apăn bruă. Laih dong ăt hơmâo hơdôm tơlơi phiăn wai pơgang brơi mơnuih mă bruă mut phung ngă tui tơlơi glăm ba, tơlơi gơgrong mơng ƀing gơñu, sit biă ñu lĕ amăng bruă pơ ala brơi, wai pơgang tơlơi dưi djơ̆ tơlơi phiăn, sit nik mơng mơnuih mă bruă. Yua anun, anai lĕ sa tơlơi yôm biă mă mơ̆ mơnuih mă bruă mut phung glăk hơmâo ră anai”.

Tui tơlơi lăng nao mơng ƀing mơnuih mă bruă sui thun amăng Jơnum min, ơi Nguyễn Hòang Năng, Khua Jơnum min djop djuai ania mơnuih mơnam Việt Nam hơđăp ƀôn prong Hồ Chí Minh brơi thâo, tơlơi črâo trun anai djơ̆ hăng kiăng, samơ̆ kiăng mut nao tơlơi sit nik ăt kiăng hơmâo tơlơi pơkă tong ten, ha amăng plĕ mơng glông trun pơ yŭ.

“Kâo pơmĭn Jơnum Ping gah đơ đam dêh čar amra ba tơbiă hơdôm tơhnal pơkă ngă hiưm pă kiăng pơgiong klă ƀiă, kiăng djru brơi ƀing apăn bruă dưi ngă bruă khin hơtai ƀiă. Sit biă ñu ră anai dŏ kơnong gong gai ƀon lan dua gưl, anŏ bơdjơ̆ nao ngă hiưm pă brơi kơ giăm lơm ngă giăm ăt ƀu amuñ lơi. Pơhmutu hlâo anun, mơng phường truh pơ kuận samơ̆ ră anai mơng phường truh pơ plơi prong ăt jê̆ giăm samơ̆ kiăng hơmâo tơlơi gal ăt ƀu amuñ ôh. Čang rơmang pơ anăp anai ƀing khua mua amra pơgôp hiăp hăng Ping gah kiăng hơmâo hơdră pơkă klă ƀiă dong”.

Tui sit nik brơi ƀuh, mah hơmâo tơlơi pơtrun mrô 73/2023/NĐ-CP kơ wai pơgang brơi mơnuih apăn bruă ngă bruă hur har, thâo pơčeh, ăt dŏ hŭi, ƀu gưt ngă yua hŭi ngă soh, “hŭi arăng rơkâo glăm ba”. Črăn tơlơi pơtrun phrâo mơng Ding jum wai lăng bruă mă amăng pơsir hĭ bruă ngă soh mơng ƀing apăn bruă pơhrua tơlơi pơkă lui hĭ tơlơi ngă soh mơng ƀing apăn bruă lơm ngă djơ̆ tơhnal pơkă, huăi yua tơlơi dưi pô mơ̆ yua mơng pơkŏn lĕ tơlơi yak nao yôm phăn, pơkă brơi tong ten bruă wai pơgang brơi mơnuih thâo pơmĭn khĭn ngă, pơjing “Anih đăo gơnang djơ̆ tơlơi phăn” kiăng ƀing apăn bruă hơđong pran ngă bruă yua kơ tơlơi dưi hrŏm./.