Hơdor glăi hrŏm hăng tơlơi hok mơ-ak hơdôm hrơi đơđam dêh čar anăp nao hơdor glăi 78 thun hrơi akŏ pơjing kơnuk kơna lŏn ia lơ 2/9/2023, dua rơkơi bơnai ơi Hoàng Minh Lý, 79 thun, dŏ ƀơi ƀut plơi 8, să giăm guai Ea Bung, tơring glông Ea Súp ăt mơ-ak ƀu thâo pơdah hơpă lơi. Ƀrô tal anai, dua rơkơi bơnai ñu hơmâo puih kơđông tơhan wai lăng amăng jang Đắk Ruê hrŏm hăng sa, dua čô mơnuih čơmah jao “sang rông ba giăm guai” nua ñu 80 klăk prăk. Ñu brơi thâo, thun tha rơma hăng hơmâo lu tơlơi ruă kă, hơmâo man pơdong sang phrâo rơhaih tui anai ñu ăt ƀu khin pơmĭn nao lơi.

“Kâo hok mơ-ak biă mă, yua kơ hơmâo ling tơhan jak iâu ƀing mơnuih čơmah djru brơi abih pran jua kiăng man pơdong brơi sang dŏ giăm guai. Lơm man pơdong giong, kâo nao dŏ laih, huăi bơngŏt kar hăng sang tơ̆i hơđăp dong tah. Lơm hơmâo sang prong rơhaih tui anai ngă mơ-ak amăng pran jua hăng amra gir run hơdip sui hăng ană tơčô”.

Ea Bung lĕ sa amăng tlâo boh să giăm guai tơring glông Ea Súp. Đơ đam să ră anai hơmâo 1.053 boh sang anŏ hăng rơbêh 4.100 čô mơnuih, hơmâo 8 djuai ania dŏ hơdip hrŏm. Bruă pơhlôm hơđong amăng plơi pla lêng kjăp, tơlơi hơdip neh met wa jai hrơi hrưn đĭ. Ơi Trần Thanh Thản, Khua Jơnum min djop djuai ania mơnuih mơnam Việt Nam să Ea Bung brơi thâo, ba truh tơlơi anai lĕ ha bơnah yua tơlơi gum djru mơng tơhan wai pơgang amăng jang Đắk Ruê:

“Rĭm thun ƀing ling tơhan pok lu wŏt bruă pơtrut wai pơgang guai lŏn ia, hăng pok pơhai hơdôm anih pơtop hrăm brơi neh met wa, djru brơi mơnuih ƀon sang ngă hmua pơdai yuă hơpuă hơmâo hmăi, boh thâo amăng rông rơmô tuh hrôh. Laih dong, amăng bơyan ngui ngor, ƀong tết rĭm thun anom bruă lêng kơ nao tơña bla, ƀơk gơnam brơi hơdôm boh sang anŏ ƀun rin, hơdră kiăng pơalum pran jua neh met wa čơkă thun phrâo pơđao amăng pran jua”.

Puih kơđong tơhan wai pơgang amăng jang Đắk Ruê ră anai glăk wai lăng guai lŏn ia glông giăm 8 km hăng gong guai mrô 42 amăng să giăm guai Ea Bung, tơring glông Ea Súp, tơring čar Dak Lak, giăm guai tơring čar Muldulkiri, dêh čar Kur. Thượng tá Phạm Đức Khá, mơnuih apăn bruă ƀơi puih kơđông amăng jang Đắk Ruê brơi thâo, hơdôm thun laih rơgao, hrŏm hăng bruă wai pơgang kjăp guai lŏn ia, ƀing apăn bruă, ling tơhan amăng puih kơđông ăt pơjing kjăp pran gum pơgôp mơng mơnuih ƀon sang.

Hăng tơlơi pơsit, “Puih kơđông, guai lŏn ia lĕ plơi pla, mơnuih djuai ania ƀiă lĕ adơi ayong anong wa”, anom bruă hơmâo ngă tui tŭ yua bruă djru mơnuih ƀon sang hluai tui hơdôm jơlan hơdră anun lĕ: rông ba ƀing amĭ Việt Nam sông kơtang, “ană rông puih kơđông tơhan”, “čung ba čơđai nao sang hră”, hrơi ngui tuk ƀañ tek”, man pơdong “sang rông ba giăm guai”, djru hơdôm hơbô̆ bruă pơđĭ kyar bơwih ƀong huă pơhrŏ trun ƀun rin. Hrŏm hăng anun, anom bruă ăt gir run nao tơl plơi pla, djru brơi Ping gah, gong gai ƀon lan man pơkra anih anom, jơlan glông, pơphô bruă pơjing Ping gah jai hrơi kjăp amăng djop mơta, ngă tui tŭ yua hơdôm hơdră mơng Ping gah, Kơnuk kơna, Thượng tá Phạm Đức Khá brơi thâo:

“Ră anai, ƀing gơmơi hơmâo 16 čô mơnuih apăn bruă Ping gah amăng grup mă bruă jang jai ƀơi 6 khul apăn bruă amăng djop plơi pla; hăng 16 čô mơnuih apăn bruă hơmâo jao djru brơi hơdôm boh sang anŏ ƀun rin ƀơi kual giăm guai. Mơng ƀing pô anai, ƀing gơmơi juăt git gai jê̆ giăm hăng khul Ping gah ƀơi ƀon lan kiăng ngă tui hơdôm tơlơi pơtrun amăng plơi pla dưi mut hrŏm sit nik. Mơng anun, pơphô bruă brơi gưl Ping gah kiăng hrŏm hăng gong gah pơjing să jai hrơi prong kơtang, mơnuih ƀon sang ƀơi kual giăm guai tơlơi hơdip jai hrơi trơi pơđao hăng yâo mơ-ak ƀiă dong”.

Tơlơi gum djru mơng tơhan wai pơgang guai hơmâo djru brơi Ea Bung jing să giăm guai blung a ƀơi Dak Lak dưi đĭ plơi pla phrâo amăng thun 2021. Tơlơi hơdip jai hrơi hrưn đĭ, neh met wa gir run mut hrŏm tơhan wai pơgang guai wai pơgang hơđong guai lŏn ia./.