Ră anai đơ đam dêh čar hơmâo rơbêh 86.000 grup wai pơgang rơnuk rơnua, hơđong hăng rơbêh 276.000 čô ding kơna mut hrŏm. Tơdơi kơ 1 thun pok pơhai tơlơi phiăn tơhan wai pơgang rơnuk rơnua, hơđong amăng ƀon lan, boh than yôm hloh lĕ bruă pơgang rơnuk rơnua ƀơi ƀon lan lêng hơmâo pơhlôm kjăp, mơnuih ngă soh tŏ tui hrŏ trun, lu ƀon lan lăi pơthâo bruă rơdêh pơjrŏm amăng jơlan glông jai aset tui, hơdôm ngă sat amăng, mơnuih mơnam hrŏ mơn; bruă pơgang rơnuk rơnua lŏn ia jai ngă dơlăm tui, sit nik, pơgôp pơjing, hơkrŭ wai pơgang amăng mơnuih ƀôn sang pơlir hăng bruă wai pơgang amăng abih bang mơnuih ƀôn sang jai kjăp tui…Jao tơlơi pơsit apah bơni brơi ƀing ba gru amăng mông Jơnum, Khua dêh čar ơi Phạm Minh Chính pơpŭ hăng pơsit tong hơdôm tơlơi gum pơgôp yôm phăn mơng tơhan mut hrŏm wai pơgang rơnuk rơnua, hơđong ƀơi ƀon lan-anai lĕ ƀing mơnuih jê̆ giăm mơnuih ƀôn sang.

Mah tui anun, Khua dêh čar lăi rơđah nao kơ prăk apah rĭm blan brơi ƀing pô anai ƀơi sa, dua boh plơi pla dŏ aset; rơdêh, gơnam măi mok djru brơi dŏ aset…Ñu rơkâo kơsem min, ba tơbiă hơdră kah mă yua ngăn drăp gơnong glông kiăng djru brơi ƀon lan tơnap tap, kual ataih, asuek, kual čư̆ siăng amăng bruă apah prăk, djru gơnam măi mok, rơdêh nao rai brơi tơhan mut hrŏm wai pơgang rơnuk rơnua, hơđong ƀơi ƀon lan. Ding jum kông ang kiăng đing nao pơtô hrăm kiăng kơ hluh rơđah tơlơi phiăn, bruă mă; tŏ tui pel ĕp, pơtrut tañ bruă pơhlôm brơi gơnam pioh yua brơi ƀing pô anai kiăng lăp djơ̆ tơlơi rơkâo, bruă jao.