VOV4.Jarai-Mơguah lơ 10/10, ƀơi Sang jơnum prong khua mua pơ ala mơnuih ƀôn sang dêh čar, pơphun jơnum lok 16 Jơnum min apăn bruă git gai pơ ala mơnuih ƀôn sang dêh čar tal 15. Jơnum amăng 3 hrơi, tal jơnum anai, ding kơna Jơnum min apăn bruă git gai pơ ala mơnuih ƀôn sang dêh čar amra sem lăng, pơgôp hiăp kơ boh yôm phun pơdah thâo amăng mông jơnum prong lok 4 khua mua pơ ala mơnuih ƀôn sang dêh čar tal 15, him lăng pok jơnum amăng lơ 20/10 pơ anăp anai. Kơ bruă mă čih pơkra tơlơi phiăn, ƀơi mông jơnum anai, Jơnum min apăn bruă git gai pơ ala mơnuih ƀôn sang dêh čar djru pơgôp hiăp Hră pơtrun mơ̆ng anom bruă khua git gai pơ ala mơnuih ƀôn sang dêh čar brơi lông ngă tui mă ruah mrô rơdêh ôtô tui hăng hơdră juă nua.

Jơnum abih bang mơ̆ng Jơnum min git gai pơ ala mơnuih ƀôn sang dêh čar

Jơnum min apăn bruă git gai pơ ala mơnuih ƀôn sang dêh čar ăt pơgôp hiăp kơ hră lăi pơthâo čih pioh tơlơi pơgôp hiăp mơ̆ng mơnuih ruah khua hăng mơnuih ƀôn sang mơ-it đĭ kơ mông jơnum lok 4; Hră lăi pơthâo boh tơhnal sem lăng pơsir, lăi glăi tơlơi rơkâo mơ̆ng mơnuih ruah khua mơ-it kơ jơnum lok 3; Hră lăi pơthâo boh tơhnal tŭ jum mơnuih ƀôn sang, pơsir hră mơnuih ƀôn sang tơgŭ kơđi laih anun bruă krăo lăng pơsir hră tơgŭ kơđi mơ̆ng mơnuih ƀôn sang mơ-it kơ khua mua pơ ala mơnuih ƀôn sang dêh čar thun 2022 hăng lu bruă yôm pơkŏn dơ̆ng.

Nay Jek: Pơblang