Tui lăi pơthâo, tơring čar Lâm Đồng ră anai hơmâo 2.938 akŏ bruă tuh pơ alin ăt dưi pok pơhai ngă, abih tih prăk tuh pơ alin rơbêh 2,1 klăk klai prăk. Mơng pel ĕp, hơmâo 359 akŏ bruă bưp tơnap tap, gun găn hăng abih tih prăk tuh pơ alin 245.000 klai prăk. Samơ̆, truh ră anai phrâo pơsir hĭ 22 akŏ bruă amăng abih bang 359 akŏ bruă. Hơdôm tơlơi gun lu hloh bơdjơ̆ nao luk puk amăng bruă dưm dăp man pơdong-đang glai-gơnam amăng atur lŏn; hră pơ-ar pơplih mă yua lŏn mơnai, glai rưng; kraih pơhrui glăi lŏn mơnai; abih hrơi tuh pơ alin yua hrơi blan ngă hră pơ-ar sui đơi; đôm hnưh lu. Ơi Phạm Dũng, Khua khul wai lăng kông ti tuh pơ alin apui lơtrik drai ia Cam Ly brơi thâo, kông ti glăk tuh pơ alin 10 akŏ bruă ƀơi Lâm Đồng. Rơngiao kơ tơlơi tơnap tap hrŏm, kông ti ăt bưp tơnap amăng ngă hră pơ-ar lơm kah gưl, tơlơi glăm ba amăng pơsir hĭ ngă hră pơ-ar.

“Yua hơdră bruă phrâo phrâo anai kah gưl jao brơi phường, mah ƀing adơi ayong gưl phường ăt dong yua biă mă, ngă tui khut khăt samơ̆ yua phrâo đơi anun ngă tui kaih, găn rơgao hơdôm blan samơ̆ ƀu dưi pơsir hĭ ôh. Truh hrơi prap pơsir hĭ, prap kĭ mơ̆ lơ 31/1 rơgao pơplih hĭ tơlơi glăm ba yua anun ngă gun dong”.

Tui tơlơi sit nik brơi ƀuh, akŏ bruă rơngiă hĭ prong hloh yua hrơi blan pioh kơnong kơ bruă pơgiong abih bang tơlơi yak nao pơplih pơkra, pơhrua hră pơ-ar yua pơplih tơlơi pơkă ƀudah tơlơi glăm ba. Lơm hră pơ-ar giăm pơgiong, tơlơi pơkă hơmâo pơplih glăi, hră pơ-ar kiăng ngă glăi mơng blung, ngă hrơi blan tuh pơ alin dŏ đôm glăi amăng hră pơ-ar.

Ơi Hồ Văn Mười, Ding kơna Ping gah gơnong glông, Khua Jơnum min mơnuih ƀôn sang tơring čar Lâm Đồng brơi thâo, tơring čar hơmâo akŏ pơjing 6 grup mă bruă yua 6 kơ-iăng Khua jơnum min mơnuih ƀôn sang tơring čar ngă akŏ, nao pel ĕp tơl anih, lăng glăi rĭm akŏ bruă. Tơring čar glăk ƀơƀrư̆ ƀuh rơđah hăng pơsir hĭ tơnap tap brơi rĭm grup akŏ bruă.

“Ră anai hơmâo dưm dăp, lăng glăi tong ten laih, bruă kiăng ngă pơ anăp lĕ kiăng đing nao pơsir hĭ. Hơdôm tơlơi tơnap tap, gun găn anai mah hiưm pă tŭ mơn, him lăng hơmâo đôm glăi 5 thun ƀudah 10 thun, đa 15 thun laih, samơ̆ ƀing ta amra ngă ƀơƀrư̆, amuñ ngă hlâo, tơnap ngă tơdơi, bruă hơget kiăng ngă hlâo ta ngă hlâo, bruă hơget kiăng ngă tơdơi ta ngă tơdơi. Djop gơnong bruă, sang bruă, gong gai ƀon lan ngă hiưm pă hơmâo boh pơhiăp klă hloh, ber hloh hăng tŭ yua hloh, ĕp jơlan pơsir hĭ tơnap tap brơi hơdôm anom bruă amăng hrơi mông tañ hloh”.

Tơring čar Lâm Đồng ba tơbiă hơnong pơkă pơđĭ kyar thun anai mơng 10 truh pơ 15%, bruă pok phư 359 akŏ bruă hăng rơbêh 245.000 klai prăk tuh pơ alin glăk gun găn hơmâo pơsit lĕ bruă jao ječ. Ơi Y Thanh Hà Niê kđăm, Ding kơna Ping gah gơnong glông. Khua git gai Ping gah tơring čar, Khua grup khua pơ ala mơnuih ƀôn sang tơring čar Lâm Đồng brơi thâo, bruă anai ƀu djơ̆ kơnong lĕ pơsir hĭ hră pơ-ar phara đôč ôh mơ̆ ăt kiăng pơplih djop bruă mă, pơsir hĭ tañ biă, pơhlôm hơđong hăng bơdjơ̆ hrŏm amăng glăm ba-kiăng tañ pơplih jing tơlơi pơđĭ kyar sit nik.

“Hrŏm hăng pơsir hĭ bruă ngă hră pơ-ar, tơring čar ăt kiăo tui tơlơi pơmĭn akŏ bruă kiăng pok pơhai djơ̆ tơlơi phiăn, djơ̆ tơlơi ƀuăn, pơhlôm mă yua lŏn mơnai klă, tŭ yua tuh pơ alin hăng tơlơi dưi hrŏm mơng Kơnuk kơna, anom bơwih ƀong hăng mơnuih ƀôn sang. Tơring čar hok mơ-ak lơm anom bruă tuh pơ alin ngă tui tơpă, laih dong gir run pơsir hĭ hơdôm bruă kaih, kaih pok pơhai, sui hrơi, ngă huač pơrai kông ngăn”.

Phrâo anai, kơ-iăng khua dêh čar ơi Nguyễn Hòa Bình ăt hơmâo mông mă bruă hăng tơring čar Lâm Đồng kiăng pơsir hĭ tơnap tap, gun găn hơdôm akŏ bruă amăng ƀon lan. Amăng mông mă bruă, Lâm Đồng rơkâo gơnong glông sem lăng, hơmâo tơlơi pơsir hĭ 27 akŏ bruă akŏ phun. Lu hloh lĕ akŏ bruă hơmâo bơtŭ ư mơng lu rơwang hlâo anun, ră anai dŏ gun bơdjơ̆ nao hơdră bruă kơ lŏn mơnai, juă nua, pơplih dưm dăp hăng dong amăng akŏ bruă kiăng pơsir hĭ tui tơlơi klah čun pel ĕp, tơhnal pơkă pơplih tui hơdôm tơlơi pơtrun phrâo mơng Ƀirô khua pơ ala mơnuih ƀôn sang dêh čar. Git gai mông mă bruă, Kơ-iăng khua dêh čar ơi Nguyễn Hòa Bình lăi pơtong, hơdôm akŏ bruă kaih ba mă yua glăk ngă rơngiă lu, ngă hrŏ trun ngăn rơnoh mơng anom bơwih ƀong sĭ mơdrô hăng ƀon lan. Ñu rơkâo tơring čar pơsir hĭ khut khăt hơdôm akŏ bruă tui tơlơi glăm ba; hơdôm akŏ bruă dŏ gun găn, kiăng lăi pơthâo djop hăng Khul git gai kiăng sem lăng, pơsir hĭ djơ̆ tơlơi pơkă. Lăi pơtong tơlơi pơkă pơsir hĭ, kơ-iăng khua dêh čar ơi Nguyễn Hòa Bình lăi rơđah:

“Abih bang akŏ bruă ƀing apăn bruă lăi pơthâo lu hloh hơmâo pơsir hĭ tui tơlơi pơtrun mrô 170 hăng 265 mơng Ƀirô khua pơ ala mơnuih ƀôn sang, samơ̆ kiăng djop dua tơlơi gal. Blung hlâo, hơmâo pel ĕp laih hăng hơmâo tơlơi lăi pơthâo tong ten ngă soh hă ƀŭ; tơdah ngă soh kiăng pơsir hĭ ƀing ngă soh. Dua dong lĕ, akŏ bruă kiăng hơmâo amăng hră pơ-ar yua Kơnuk kơna čih tui tơlơi rơkâo mơng Ding jum kơđi čar hăng Ƀirô khua pơ ala mơnuih ƀôn sang. Kiăng hơmâo amăng hră pơ-ar, khŏm lăi pơthâo amăng plang 751, mrô jŭ yap kiăng djop, pơmut hrŏm”.

Hăng pran jua gum hrŏm ƀon lan, tơlơi git gai mơng Kơnuk kơna amăng mông mă bruă hăng tơring čar Lâm Đồng ha wŏt dong pơsit tong tơlơi gir run pơsir hĭ gun găn kơ tơhnal pơkă, pok phư ngăn rơnoh samơ̆ ăt pơhlôm tơlơi pơkă pơpŭ tơlơi phiăn, anăm pơgang ba tơlơi ngă soh, anăm ngă pơrai kông ngăn kơnuk kơna. Anai ăt lĕ tơlơi yak nao tong ten, ngă tui djơ̆ tơlơi črâo trun pơplih kơtang tit, ngă gêh gal tuh pơ alin brơi rơđah rơđông, hơđong-kiăng Lâm Đồng khin hơtai hrưn đĭ, pơđĭ kyar tañ hăng hơđong kjăp amăng rơnuk hrưn đĭ pô mơng lŏn ia ta./.