VOV4.Jarai - Mơguah lơ 19/9, ƀơi Sang mă bruă Khua pơ ala mơnuih ƀôn sang dêh čar, Khua git gai wai lăng pơ ala mơnuih ƀôn sang dêh čar ta ơi Vương Đình Huệ git gai hăng đĭ pơhiăp amăng mông Jơnum tui akô̆ bruă tơlơi phiăn blan 9/2022 mơng Jơnum min apăn bruă Khua pơ ala mơnuih ƀôn sang dêh čar kiăng gum pơhiăp kơ rơwang bruă tơlơi phiăn bơwih bruă tui điện tử (pơplih pơkra).

Pơphun amăng 5 hrơi ha mơkrah, amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ 7 rơwang bruă tơlơi phiăn hăng 2 hră čih pơkra Tơlơi pơtrun pơsit, amăng anun hmâo rơwang bruă Tơlơi phiăn lŏn drŏn (pơplih pơkra) kiăng lăi pơthâo kơ Khua pơ ala mơnuih ƀôn sang ƀơi Tal jơnum lok 4, Khua pơ ala mơnuih ƀôn sang dêh čar ta tal 15. Pơhiăp amăng mông pok phun mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo: Rơwang bruă Tơlơi phiăn lŏn drŏn (pơplih pơkra) dưi bơkơtuai, gum pơhiăp amăng 3 tal jơnum. Khua pơ ala mơnuih ƀôn sang bơkơtuai amăng Tal jơnum lok 4 hăng pel ĕp hluai tui Tal jơnum lok 6 amăng blan 11 thun 2023. Khua git gai wai lăng mơnuih ƀôn sang dêh čar lăi rơđah, kiăng prăp lui pel ĕp glăi rơwang bruă Tơlơi phiăn, truh ră anai Jơnum min bơwih ƀong hăng hơdôm ƀirô mơng Khua pơ ala mơnuih ƀôn sang hmâo pơphun lu bruă jơnum, bơkơtuai./.

Siu H’ Prăk: Pơblang