Tơring čar Dak Lăk glăk pok pơhai man pơdong 3 boh sang hră kơnuk kơna čem rông čơđai ƀơi hơdôm boh să gah guai Ia R’vê, Ia Lốp, hăng Ƀuôn Đôn, prăk pioh man pơdong lĕ 390 klai, bơwih brơi giăm 3.300 čô čơđai sang hră gưl sa hăng dua. Hơdôm boh sang hră khŏm man pơdong giong, ba mă yua amăng blan 8 thun anai.

Ơi Võ Văn Lợi, Kơ-iăng khua Anom bruă wai lăng kơčăo bruă Tuh pơ alin man pơdong tơring čar Dak Lăk brơi thâo, pô tuh pơ alin glăk sem lăng tơlơi pơčrâo brơi mơ̆ng Ding jum man pơdong či pơphô brơi hơdră pơklaih hĭ tơlơi tơnap kơ anom bruă gơgrong man pơdong. Mah dŏ hơmâo lu tơlơi tơnap yua ayuh hyiăng ƀu lăp, gơnam či man pơdong, mơnuih mă bruă, hơdôm anom bruă man pơdong hăng pô gơgrong glăk gir ngă hrŏm pơklaih brơi anŏ tơnap, gir ngă tañ kiăng sang hră kơnuk kơna čem rông čơđai pơ guai dêh čar dưi mă yua tañ, bơwih brơi tơlơi kiăng hrăm mơ̆ng čơđai sang hră pơ guai dêh čar./.