Đĭ pơhiăp ƀơi mông jơnum, Khua dêh čar, ơi Phạm Minh Chính lăi lĕ, ƀing apăn bruă kơnuk kơna  hăng sang bruă kơnuk kơna tơdơi kơ pơmut glăi mah pơphun djop laih laih anun dăp glăi hơbôt samơ̆ aka ƀu hơđong sit nik ôh; ƀing khua mua, mơnuih apăn bruă čar, tơlơi pơhing mơ-it nao rai aka ƀu tŭ yua ôh, biă mă ñu amăng bruă wai lăng guai lŏn plơi, lŏn sang đang hmua, man pơdong aka ƀu hơđong ôh.

Pơ anăp anai, Khua dêh čar rơkâo djop ding jum anom bruă ngă tui djơ̆ jơlan hơdră pơtrun, tơlơi phiăn pơkă. Pơphun brơi sang bruă, anăn bruă mă, mơnuih apăn bruă ngă khua brơi  djop, djơ̆, rơkâo Ding jum wai lăng bruă čar dăp glăi, čih anăn bruă mă, pơpha bruă kiăng djơ̆ găl hơđong kơ gong gai kơnuk kơna dua gưl, biă mă ñu gưl pơyŭ ta juăt ƀơi să, plơi pla, kiăng hmao hăng lăp djơ̆.

Khua dêh čar ơi Phạm Minh Chính čang rơmang abih bang glông bruă kơči čar, sang bruă kơnuk kơna ăt khom pơđĭ tui pran jua mă bruă khut khăt hloh, tơlơi gir run prong, thaoa gum pơgôp nao rai, gơgrong ba amăng bruă kiăng akŏ pơdong kơnuk kơna mă bruă phrâo, rơgơi, beč bal, tơpă, ngă bruă yua kơ mơnuih ƀôn sang, yua kơ dêh čar biă mă.